AOKAda o‘tkazilgan brifingda “O‘ztemiryo‘lnazorat” inspeksiyasi axborot xizmati rahbari Firdavs Xayriddinov sohaga oid qabul qilingan yangi qonunchilik hujjatlari mazmuni haqida ma’lumot berdi.
Qayd etilishicha, temiryo‘l transporti hamda metropolitenda harakat va tashishlar xavfsizligi talablarining buzilishi bilan bog‘liq hodisalarni tasniflash, xizmat tekshiruvi olib borish tartibi belgilangan. Transport vazirligining tegishli buyrug‘i, shuningdek, kelgusida harakat va tashishlar xavfsizligi buzilishlari kelib chiqishining oldini olishga xizmat qiladi.
Hududida harakat va tashishlar xavfsizligi talablarining buzilishi bilan bog‘liq hodisalar sodir bo‘lgan temir yo‘l transporti subyektlari yoki metropoliten mas’ul xodimlari mavjud aloqa vositasi orqali vakolatli organlarni hamda harakatdagi tarkib va yuk manfaatdori yoki egalarini sodir bo‘lgan hodisa haqida darhol xabardor qilishlari lozim bo‘ladi.
Sodir bo‘lgan holatning ko‘lamidan kelib chiqib, Transport vazirligi komissiyasi, temiryo‘l transporti subyekti komissiyasi va metropoliten komissiyasi tuziladi. Komissiyalar o‘z vakolati doirasida xizmat tekshiruvini tashkil qilish hamda yakuniy xulosa berish yuzasidan qarorlar qabul qiladi.
Xizmat tekshiruvini o‘tkazish muddati o‘n besh ish kunidan ortiq bo‘lmasligi kerak.
Izoh (0)