Bugun, 21-sentabr kuni O‘zbekiston Oliy sudi kassatsiya sudlov hay’ati sud majlisida Sog‘liqni saqlash vazirligining noqonuniy bo‘shatilgan ikki xodimi qayta ishga tiklandi va ularga yetkazilgan moddiy zarar qoplab beriladigan bo‘ldi. Bu haqda “Daryo” muxbiri xabar bermoqda.
Kassatsiya sud majlisida bir xil mazmundagi ish ko‘rib chiqildi. Ya’ni 2021-yilning iyul oyida Sog‘liqni saqlash vazirining tegishli buyrug‘i bilan Yuridik bo‘lim boshlig‘i Ruslan Muhammadiyev va Kompleans, ichki audit va moliyaviy nazorat xizmati boshlig‘i Baxtiyor Xajixanovni ishdan bo‘shatiladi.
Ishda bo‘shatishga asos sifatida prezidentning sobiq maslahatchisi Abdujabbor Abduvohitovning SSVga yuborgan ko‘rsatma xati: “Sog‘liqni saqlash vazirligida faoliyat olib borayotgan quyidagi xodimlarni joriy yilning 5-iyul kunidan egallab turgan lavozimidan ozod etish so‘raladi”, deb 4 nafar xodimning ro‘yxati zikr etilgan. Ular orasida Ruslan Muhammadiyev hamda Baxtiyor Xajixanov ham bo‘lgan.
Davlat maslahatchisining xatiga muvofiq SSV xodimlarni Mehnat kodeksining 106-moddasi 6-bandi bilan “qonunda nazarda tutilgan boshqa hollar”da degan punkti bilan ishdan bo‘shatib yuborgan.
Advokat Bahodir Ahmedovning ta’kidlashicha, mavjud vaziyatda javobgar ish beruvchining eng katta xatosi prezidentning sobiq davlat maslahatchisi tomonidan yuborilgan 2021-yil iyulda xatini qonunda nazarda tutilgan boshqa hollar deb qabul qilgani va shu asosda buyruq chiqarganidir.
“Qonunda nazarda tutilgan boshqa hollar deganda biz faqatgina, qonun deb nomlangan normativ-huquqiy hujjat turida nazarda tutilgan Mehnat kodeksining 106-moddasi 1-5-bandlaridan tashqaridagi boshqa bir holatlarni tushunamiz, prezident davlat maslahatchisining xati hech qanchon bunday qonunning o‘rnini bosa olmaydi. Mehnat shartnomasini bekor qilish haqidagi buyruqning na kirish qismida, na bayon va na yakuniy asos qismida birorta qonun yoki qonun hujjatidagi boshqa holatlar keltirilmagan. Mehnat kodeksining 106-moddasi 6-bandida esa, aynan qonundan olingan alohida holatlar buyruq chiqarish uchun asos bo‘lishi mumkinligi qayd etilgan. Bu vajlarimiz ham buyruqning noqonuniyligini to‘laqonli ravishda tasdiqlaydi”, — dedi advokat.
Ish Oliy sudga kelgunga qadar fuqarolik ishlari bo‘yicha Shayxontohur tumanlararo sudi va fuqarolik ishlari bo‘yicha Toshkent shahar sudi tomonidan bu xatni qonunga tenglashtirib qo‘ygan, Mehnat kodeksining 106-modda 6-bandi bo‘yicha to‘g‘ri bo‘shatilgan deb topgan.
Oliy sudning fuqarolik ishlari bo‘yicha kassatsiya sudlov hay’ati sudyalari mehnat munosabatlarini bekor qilish masalasida biror-bir qonun bo‘yicha vakolatga ega bo‘lmagan davlat maslahatchisining xati xodimlarni to‘g‘ridan to‘g‘ri ishdan olishga, xususan, Mehnat kodeksining 106-moddasi 6-bandi bilan mehnat shartnomasini bekor qilishga asos bo‘la olmasligini ta’kidladi.
Sud da’vogralar: Ruslan Muhammadiyev va Baxtiyor Xajixanovni o‘z ishiga tiklanishi, noqonuniy buyruq bekor qilinib, ularga yetkazilgan moddiy zarar (majburiy progul summasi) jami 338 million so‘mni undirilishi haqida ajrim chiqardi.
Izoh (0)