Ўзбекистон қизилмия етиштириш ҳажми бўйича дунёда биринчи ўринни эгаллади

Буюк Британиянинг The Economist журналида Оролбўйи минтақасини тиклашга қаратилган экологик лойиҳа мавзусига бағишланган мақола чоп этилди, деб хабар бермоқда «Дунё» ахборот агентлиги.

Қайд этилишича, унда тиббиёт ва озиқ-овқат саноатида ишлатиладиган қизилмия илдизини етиштириш бўйича лойиҳанинг натижадорлиги билан боғлиқ тафсилотлар батафсил қаламга олинган.

«Жаҳон банки маълумотларига кўра, 2017—2021 йилларда Ўзбекистондан қизилмия экстракти экспорти ҳажми 30 миллион долларга етган. Ўзбекистон ўтган йили қизилмия етиштириш ҳажми бўйича дунёда биринчи ўринни эгаллади. Қорақалпоғистон ушбу лойиҳанинг марказида», — деб ёзади журнал.

Мақолада Қизилмия етиштирувчилар миллий ассоциацияси раиси Мурат Ғаиповнинг қизилмия экспорти сезиларли даражада ошгани ҳақидаги фикрлари келтирилган. «Бу ҳукуматнинг қўшимча қийматли маҳсулотлар экспортини рағбатлантириш стратегиясига мос келади. Масалан, нефть маҳсулотлари ўрнига тайёр пластмасса, пахта ўрнига тўқимачилик маҳсулотлари», — деб ёзади нашр.

Қорақалпоғистонда қизилмияни қайта ишлаш корхоналари ташкил этилган бўлиб, уларнинг бир қисми хитойлик инвесторлар иштирокида тузилган. Ушбу корхоналар солиқ имтиёзларига эга бўлиб, божхона тўловларидан озод қилинган.

Ҳозирги вақтда қизилмия илдизига асосланган маҳсулотлар ассортименти жуда кенг - бу шампунлар, чой, дори-дармонлар. Мутахассиснинг фикрича, компаниялар сони ортиши билан Ўзбекистон қизилмия экстракти ишлаб чиқаришдан тайёр маҳсулот ишлаб чиқаришга ўтиши ва қизилмия экспортини икки баробарга ошириши мумкин.