O‘zbekistonning muvaqqat ishlar vakili Nodir G‘aniyev Shvetsiya Tadbirkorlik va innovatsiyalar vazirligining Agrar masalalar departamenti bosh direktori Yoxan Kraft hamda Yevropa Ittifoqi va xalqaro hamkorlik departamenti boshlig‘ining o‘rinbosari Kerolayn Tornemo bilan uchrashdi, deb xabar bermoqda “Dunyo” axborot agentligi.
Qayd etilishicha, muzokaralar chog‘ida innovatsiya, raqamlashtirish, yashil iqtisodiyot va axborot texnologiyalari sohasida O‘zbekiston—Shvetsiya hamkorligini yo‘lga qo‘yish yo‘nalishlari muhokama qilingan.
O‘zaro muloqot chog‘ida Shvetsiya innovatsiyalar vazirligining bo‘linmalari O‘zbekiston vakillari bilan amaliy aloqalarni o‘rnatishdan manfaatdor ekani bildirilgan. O‘zbekiston va Shvetsiyada innovatsiya texnologiyalari va iqtisodiy siyosat masalalariga bag‘ishlab o‘tkaziladigan xalqaro konferensiya va ilmiy-amaliy tadbirlarda ikki mamlakat ekspertlarining ishtirokini yo‘lga qo‘yish masalalari haqida fikr almashilgan.
Izoh (0)