Video o‘yinlar ishqibozi bo‘lgan tailandlik yigit 30 000 dollardan ko‘proq pul sarflab, o‘z xonasini kosmik kema ko‘rinishidagi hayratlanarli “g‘or”ga aylantirdi. 31 yoshli Tinnakorn Srivichay o‘z xonasida Star Citizen o‘yinidan C2 Herkules xayoliy kosmik kemasining boshqaruv qismini yaratdi. U birgina interyer va kompyuterlar uchun taxminan 20 000 dollar sarflagan.
Yanada realroq chiqishi uchun geymer 4400 dollarga teng 65 dyuymli uchta LED televizor ekranlarini devorlarga o‘rnatdi. Ular koinotdan Yerga qaragan maftunkor manzarani namoyish etadi.
Geymer YouTube’dagi obunachilariga shunday deydi: “G‘oya Star Citizen nomli kosmik o‘yindan olingan. Men Crusader Industries kompaniyasining The C2 Hercules nomli kemasini yoqtirib qoldim va sotib oldim. Bu kemaning ekipaj kabinasi menga Star Citizen o‘yinidagi kabinani eslatadi”.
Bu xonani qurish uchun taxminan uch oy vaqt ketdi. U turli me’morlar bilan ishlagan va ish xonasi kosmik kema ko‘rinishiga kelgunga qadar dizaynni bir necha bor qayta ko‘rib chiqqan.
“Men bu yerda kuniga 12 soat vaqt sarflayman. Ishlayman, o‘yin o‘ynayman. Bu xonaning ajoyib xususiyatlaridan biri samolyotnikiga o‘xshaydigan kabinetdir”
Ishtiyoqmand geymer Yevropadan import qilingan qismlar va materiallar bilan o‘zining real qurilmasini namoyish etdi.
“Old ekran — bu haqiqiy o‘yin monitori. Bu kosmik kema ichidagi barcha chiroqlarni telefon orqali boshqarish mumkin. Turli xil tugmachalarni bosish hissi juda ajoyib, bu yerda o‘zimni haqiqiy kosmik kemada uchayotgandek his qilaman”, — dedi u. Ovqatlanish masalasiga kelganda, burchakda uning 1400 dollarlik kichik oshxonasi ham mavjud.
“Bu yerda o‘zingizni koinotda yurgandek his qilasiz, xonadan chiqish istagini ham, tashqi dunyoni ham unutasiz”, — deydi geymer.
O‘z “g‘or”ini muvaffaqiyatli qurganidan so‘ng, u uyining boshqa qismlarini ham kosmik kema ko‘rinishida ta’mirlashni o‘ylamoqda.
Izoh (0)