Qozog‘iston Xalq partiyasi raisi va Nursulton Nazarboyevning sobiq maslahatchisi Yermuxamet Yertisbayev ma’lum qilishicha, sobiq prezident poytaxtga Ostona nomining qaytarilishiga qarshi bo‘lmagan, deb yozadi “Ulysmedia.kz”.
“Nursulton Nazarboyev mutlaqo qarshi bo‘lmaganini aniq bilaman — aynan u shaharning asoschisi, me’mori sifatida poytaxtga Ostona deb nom bergan, bu uning tashabbusi edi, va u uzoq vaqt mobaynida poytaxtning qayta nomlanishiga qarshilik ko‘rsatgandi. YouTube’da bor, uning hamma gaplarini topishingiz mumkin. Shuning uchun mana shu nuqtai nazardan, o‘ylaymanki, bunday qaror kutilgan edi”, — dedi Yertisbayev.
Bugun, 19-sentabr kuni Qozog‘iston poytaxti nomini Nur-Sultondan Ostonaga o‘zgartirish haqidagi farmon kuchga kirdi.
Mamlakat prezidenti Qosim-Jo‘mart To‘qayev shahar qayta nomlanishi haqidagi qonunni 17-sentabr kuni, mamlakat Konstitutsiyasiga tuzatishlar kiritilishi to‘g‘risidagi qonun bilan birgalikda, imzolagandi.
Poytaxtga 2019-yilda Qozog‘iston birinchi prezidenti Nursulton Nazarboyev sharafiga nom berilgan edi, o‘shanda shaharning nomini o‘zgartirishni To‘qayevning o‘zi taklif qilgandi. Undan avval poytaxt Ostona deb atalgan va unga yana shu nom qaytib berildi.
1998-yilgacha respublika poytaxti Olmaota shahri bo‘lgan, hozirgi poytaxt esa Akmola deb atalgan.
Ayni paytda Qozog‘iston poytaxtida shaharning eski — Nur-Sulton nomi yozilgan yozuvlar demontaj qilinmoqda.
Izoh (0)