AQSHning 42-prezidenti Bill Klinton Rossiya birinchi prezidenti Boris Yelsin bilan NATOning kengayishi haqidagi suhbati tafsilotlarini aytib berdi. Uning so‘zlariga ko‘ra, Yelsin NATOning Rossiyaga zarba berishiga ishonmagan. Klinton Rossiyaga alyansga qo‘shilish istiqbolini taklif qilganini yana bir bor esladi.
“Undan ‘Men Rossiyani bombardimon qilish uchun Polshadagi Amerika bazasidan foydalanaman, deb o‘ylaysizmi?’ deya so‘ragandim”, — esladi Klinton CNN telekanaliga bergan intervyusida. “U shunday javob berdi: ‘Yo‘q, lekin Rossiyada ko‘pchilik shunday deb o‘ylaydi, chunki ularning tarixiy xotirasida Gitler va Napoleon qolib ketgan”.
Klinton buni tan olgan, biroq Rossiya haqidagi tarixiy tasavvurlar rus davlati “o‘z qo‘shnilarini nazorat qilgan” Ivan Grozniy, Pyotr I va Yekatrina II kabi hukmdorlar davri bilan bog‘liqligini ta’kidlagan. Shu bilan birga Klinton odamlar endi “ularni kimdir nazorat qilishini” emas, balki o‘z yo‘lini o‘zi tanlashga intilayotgani haqida gapirgan.
“Men Rossiyaga nafaqat maxsus hamkorlikni, balki kelajakda NATOga a’zo bo‘lish istiqbollarini ham taklif qilgandim”, — dedi Klinton. Sobiq prezidentning tushuntirishicha, o‘sha paytda u “nodavlat tashkilotlar, avtoritar davlatlar, shuningdek, kimyoviy, biologik yoki yadroviy qurollarning terrorchi guruhlar qo‘liga tushishi kelajakda xavfsizlikning eng katta muammolari bo‘ladi” deb hisoblagan.
Bill Klinton aprel oyida ham Rossiya prezidentlari Boris Yelsin va Vladimir Putinga NATOga kirishni taklif qilgani haqida aytgandi. Putin Ukrainadagi harbiy operatsiya boshlanishidan biroz oldin, Qo‘shma Shtatlar 2000-yilda Rossiyaning NATOga kirishi g‘oyasiga “vazmin” munosabatda bo‘lganini ma’lum qilgan.
Izoh (0)