Birlashgan Millatlar Tashkiloti “Tolibon”ni Afg‘onistondagi qizlarning o‘rta maktabda o‘qishiga ruxsat berishga chaqirdi. Bu haqda BMTning Afg‘onistonga yordam missiyasi saytida aytilgan.
BMT missiyasi Afg‘onistonda qizlar uchun o‘rta maktablar butunlay yopilganiga bir yil to‘lgani munosabati bilan bayonot berib, ta’limni taqiqlash qizlar va ayollarning asosiy huquqlarini poymol qilish ekanini ta’kidladi.
“Bu fojiali, sharmandali yil bo‘ldi, uning oldini olish kerak edi. Qizlarning o‘rta maktabdan uzilib qolishi hech qanday jiddiy asosga ega emas va dunyoning hech bir joyida kuzatilmaydi. Bu qizlar avlodi va Afg‘oniston kelajagiga jiddiy zarar yetkazadi”, — deydi BMT missiyasi rahbari vazifasini bajaruvchi Markus Potsel.
“Tolibon” 2021-yilning avgust oyida Afg‘onistonda hokimiyatni qo‘lga kiritgach, qizlar uchun o‘rta ta’limni rasman taqiqlagan edi. 2021-yil 18-sentabrda o‘g‘il bolalar o‘rta maktablari qayta ochildi, biroq qizlarning darsga borishi taqiqlandi. Bir necha oy o‘tib, 23-mart kuni “Tolibon” Ta’lim vazirligi qizlar uchun o‘rta maktablarni ochgan, ammo bir necha soat o‘tgach, toliblar rahbariyati sinflarni yana yopishni buyurgan.
BMT missiyasi hisob-kitoblariga ko‘ra, Afg‘onistonda, birinchi navbatda, 12 yoshdan 18 yoshgacha bo‘lgan milliondan ortiq qizlar ta’lim olish imkoniyatidan mahrum.
Izoh (0)