Видео ўйинлар ишқибози бўлган таиландлик йигит 30 000 доллардан кўпроқ пул сарфлаб, ўз хонасини космик кема кўринишидаги ҳайратланарли «ғор»га айлантирди. 31 ёшли Тиннакорн Сривичай ўз хонасида Star Citizen ўйинидан C2 Herkules хаёлий космик кемасининг бошқарув қисмини яратди. У биргина интерьер ва компьютерлар учун тахминан 20 000 доллар сарфлаган.
Янада реалроқ чиқиши учун геймер 4400 долларга тенг 65 дюймли учта LED телевизор экранларини деворларга ўрнатди. Улар коинотдан Ерга қараган мафтункор манзарани намойиш этади.
Геймер YouTube’даги обуначиларига шундай дейди: «Ғоя Star Citizen номли космик ўйиндан олинган. Мен Crusader Industries компаниясининг The C2 Hercules номли кемасини ёқтириб қолдим ва сотиб олдим. Бу кеманинг экипаж кабинаси менга Star Citizen ўйинидаги кабинани эслатади».
Бу хонани қуриш учун тахминан уч ой вақт кетди. У турли меъморлар билан ишлаган ва иш хонаси космик кема кўринишига келгунга қадар дизайнни бир неча бор қайта кўриб чиққан.
«Мен бу ерда кунига 12 соат вақт сарфлайман. Ишлайман, ўйин ўйнайман. Бу хонанинг ажойиб хусусиятларидан бири самолётникига ўхшайдиган кабинетдир»
Иштиёқманд геймер Европадан импорт қилинган қисмлар ва материаллар билан ўзининг реал қурилмасини намойиш этди.
«Олд экран — бу ҳақиқий ўйин монитори. Бу космик кема ичидаги барча чироқларни телефон орқали бошқариш мумкин. Турли хил тугмачаларни босиш ҳисси жуда ажойиб, бу ерда ўзимни ҳақиқий космик кемада учаётгандек ҳис қиламан», — деди у. Овқатланиш масаласига келганда, бурчакда унинг 1400 долларлик кичик ошхонаси ҳам мавжуд.
«Бу ерда ўзингизни коинотда юргандек ҳис қиласиз, хонадан чиқиш истагини ҳам, ташқи дунёни ҳам унутасиз», — дейди геймер.
Ўз «ғор»ини муваффақиятли қурганидан сўнг, у уйининг бошқа қисмларини ҳам космик кема кўринишида таъмирлашни ўйламоқда.
Изоҳ (0)