Birlashgan Millatlar Tashkiloti Moskva va Kiyev asirlarni “hammasiga hamma” formatida almashish bo‘yicha kelishib olishiga umid qilmoqda, dedi BMT bosh kotibi Antoniu Guterrish.
“Asirlar almashinuvi — ijobiy holat. Bu asirlarning o‘zlari, ularning oilalari uchun ham azob-uqubatni kamaytiradi. Menining pozitsiyam shundaki, ko‘plab odamlarning hayotidagi ushbu dramaga barham berish uchun “hammasiga hamma” almashinuvini amalga oshirish ideal chora bo‘ladi”, — dedi Guterrish.
BMT bunday almashinuvga ko‘maklashishga tayyormi, degan savolga bosh kotib shunday javob berdi: “Odatda biz asirlarni almashishda qatnashmaymiz – bu Xalqaro Qizil xoch qo‘mitasining vakolati”.
“Albatta, biz Rossiya va Ukrainaning bu borada imkon qadar kengroq kelishuvga erisha olishini istardik”, — deya qo‘shimcha qildi u.
Ukraina va Rossiya asirlar almashinuvi haqida oxirgi marta 29-iyun kuni xabar bergandi. O‘shanda tomonlar “144 ga 144” formatida harbiy xizmatchilarni almashgan. Shundan so‘ng Rossiya Mudofaa vazirligi Kiyev va Moskva urush boshlanganidan beri 27 marta asirlar va halok bo‘lganlarning jasadlarini almashtirganini ma’lum qildi.
16-sentabr kuni Zelenskiy shunday shart qo‘ygandi: agar Rossiya ukrainalik harbiy asirlarni ozod qilsa, Ukraina ammiak tranzitiga ruxsat beradi. “Rossiya Federatsiyasidan bizning hudud orqali ammiak yetkazib berilishiga qarshiman. Men bunga faqat asirlarimiz evaziga ruxsat bergan bo‘lardim”, — dedi u va o‘z fikrini allaqachon BMTga yetkazganini ta’kidladi.
Kreml Zelenskiyning taklifini rad etdi. “Odamlar va ammiak bir xil narsami?” — dedi Rossiya prezidentining matbuot kotibi Dmitriy Peskov.
Izoh (0)