Surxondaryo viloyatida faoliyat olib boruvchi Termiz Jayxun Cluster paxta-to‘qimachilik klasteriga biriktirib berilgan yerlar boshqa klasterga noqonuniy berib yuborilgani aytilmoqda. Bu haqda klaster rahbari o‘rinbosari Dilmurod Eshniyozov “Daryo”ga qilgan o‘z murojaatida aytib o‘tdi.
Dilmurod Eshniyozovning ma’lum qilishicha, Vazirlar Mahkamasining qarori bilan tashkil qilingan klasterga biriktirib berilgan yerlar bitta yig‘ilish bayoni bilan, hech qanday ogohlantirishsiz boshqa klasterga olib berilgan.
“Bizga 3 yil avval Jarqo‘rg‘on va Qumqo‘rg‘on tumanlaridagi 15 ming 582 ming gektar yer maydoni biriktirib berilgan. Klasterimiz tashkil etilganidan buyon barcha investitsion loyihalar va bank hamda fermer xo‘jaliklari oldidagi majburiyatlarimizni to‘liq bajarib kelayotgan edik. Ammo joriy yilning mart oyida paxta-to‘qimachilik klasterlari faoliyatini muvofiqlashtirish respublika komissiyasining yig‘ilish bayoni bilan Qumqo‘rg‘on tumanidagi bizga biriktirilgan yerlar boshqa klasterga o‘tkazib berildi. Afsuski, bu amaldagi qonunlarga zid”, — dedi Dilmurod Eshniyozov.
Uning qo‘shimcha qilishicha, klaster tomonidan tortib olingan yerlarga 2022-yilning hosili uchun 1-noyabrdan fermer xo‘jaliklari bilan fyuchers shartnomasi imzolab, uni moliyalashtirib, agrotexnika: yer tekislash, shudgorlash, chigit tayyorlash kabi ishlar olib borgan. Ushbu xarajatlar uchun klaster hisobidan 34 milliard 500 million so‘m xarajat qilingan bo‘lsa-da, yer ajratilgan klaster yoki hukumat tomonidan qoplab berilmagan. Buning ustiga hosilni yig‘ib olishga ham ruxsat berilmagan.
Vazirlar Mahkamasining “Paxta-to‘qimachilik klasterlari faoliyatini tashkil etish tartibi to‘g‘risida”gi nizomga muvofiq yangi paxta-to‘qimachilik klasterini tashkil etish Vazirlar Mahkamasining qarori bilan amalga oshirilishi qayd etilgan. Lekin Termiz Jayxun Cluster paxta-to‘qimachilik klasteriga biriktirilgan yerlarni olib qo‘yish haqida Vazirlar Mahkamasi qaror qilmagan.Nizomga ko‘ra, yangi paxta-to‘qimachilik klasterlari tashkil etiladigan hududlar har yili 20-avgustga qadar mas’ul idoralarning rasmiy veb-saytlarida e’lon qilinishi va arizalar 1 oktabrga qadar ko‘rib chiqilishi belgilangan. Ammo Termiz Jayxun Cluster paxta-to‘qimachilik klasteriga biriktirilgan yerlar mavsumning o‘rtasiga kelib, mart oyida olib qo‘yilgan.
Tartibga binoan, faoliyati tugatilayotgan paxta-to‘qimachilik klasterlari tugatilayotgan yildagi mavsum bo‘yicha paxta hosilini to‘liq yig‘ib (sotib) olishga ruxsat berilsa-da, Termiz Jayxun Cluster paxta-to‘qimachilik klasteriga hosilni olishga ruxsat va sarf etilgan 34 milliard 500 million so‘m qoplab berilmagan.
Dilmurod Eshniyozov, Termiz Jayxun Cluster paxta-to‘qimachilik klasteri rahbari o‘rinbosari
Holat yuzasidan Adliya vazirligi xulosa berar ekan, O‘zbekiston Respublikasi prezidentining 2021-yil 16-noyabrdagi “Paxta-to‘qimachilik klasterlari faoliyatini tartibga solish chora-tadbirlari to‘g‘risida”gi farmoniga ko‘ra, paxta-to‘qimachilik klasterini tashkil etish Respublika komissiyasi xulosasiga asosan Vazirlar Mahkamasining qarori bilan amalga oshirilishini alohida ta’kidlab o‘tgan.
Mazkur farmonning 3-bandida talabgor va tegishli idoralar o‘rtasida to‘rt tomonlama bitim o‘ttiz yil muddatga tuzilish nazarda tutilgan bo‘lib, to‘rt tomonlama bitimni tomonlarning hech bo‘lmaganda bittasi qarshi bo‘lgan taqdirda bekor qilish faqatgina sud tartibida amalga oshirilishi belgilab qo‘yilgan.Klaster ma’muriyati yerni olib qo‘yish sabablarini bilish va o‘z qonuniy manfaatlarini himoya qilishni so‘rab Savdo-sanoat palatasiga, paxta-to‘qimachilik klasterlari uyushmasiga va huquqni muhofaza qiluvchi organlarga arz qilgan, lekin ularning bari sudga murojaat qilishni tavsiya qilish bilan cheklangan. Yiliga paxta-to‘qimachilik klasterlari uyushmasiga a’zolik badali sifatida 100 million so‘m to‘lagan bo‘lsa-da, uyushma klasterga hech qanday yordam bermagan.Shu bilan birga, Vazirlar Mahkamasining paxta-to‘qimachilik klasterlari faoliyatini tashkil etish tartibi to‘g‘risidagi nizomning 23-bandida bitimga o‘zgartirish va qo‘shimchalar kiritish taraflarning kelishuviga ko‘ra amalga oshirilib, taraflardan birining bitimga o‘zgartirish va qo‘shimchalar kiritish to‘g‘risidagi taklifi qolgan taraflar tomonidan rad etilgan taqdirda, ushbu masala yuzasidan sudga murojaat qilinishi mumkinligi nazarda tutilgan.
Mazkur nizomning 41-bandida bitimni bekor qilishga (to‘liq yoki muayyan hududga nisbatan) asos bo‘luvchi holatlar keltirilgan bo‘lib, paxta-to‘qimachilik klasterlari tomonidan bitimda nazarda tutilgan majburiyatlar belgilangan muddatda bajarilmaganda yoki paxta xomashyosi yetishtiruvchilarning uchdan ikki qismi paxta to‘qimachilik klasteri tomonidan shartnoma munosabatlarini uch yil davomida bajarilmay kelganligini asoslovchi yozma murojaatlar bo‘lganda sud tomonidan amalga oshirilishi qayd etilgan.
Yuqoridagilardan kelib chiqib, murojaatingizdan ko‘tarilgan masalalar yuzasidan belgilangan tartibda sudga murojaat qilishingiz maqsadga muvofiqligi ma’lum qilinadi, — deya Huquqni qo‘llash amaliyotini o‘rganish boshqarmasi huquqiy tushuntirish bergan.
“Daryo” voqealar rivojini kuzatib boradi.
Izoh (0)