Сурхондарё вилоятида фаолият олиб борувчи Termiz Jayxun Cluster пахта-тўқимачилик кластерига бириктириб берилган ерлар бошқа кластерга ноқонуний бериб юборилгани айтилмоқда. Бу ҳақда кластер раҳбари ўринбосари Дилмурод Эшниёзов «Дарё»га қилган ўз мурожаатида айтиб ўтди.
Дилмурод Эшниёзовнинг маълум қилишича, Вазирлар Маҳкамасининг қарори билан ташкил қилинган кластерга бириктириб берилган ерлар битта йиғилиш баёни билан, ҳеч қандай огоҳлантиришсиз бошқа кластерга олиб берилган.
«Бизга 3 йил аввал Жарқўрғон ва Қумқўрғон туманларидаги 15 минг 582 минг гектар ер майдони бириктириб берилган. Кластеримиз ташкил этилганидан буён барча инвестицион лойиҳалар ва банк ҳамда фермер хўжаликлари олдидаги мажбуриятларимизни тўлиқ бажариб келаётган эдик. Аммо жорий йилнинг март ойида пахта-тўқимачилик кластерлари фаолиятини мувофиқлаштириш республика комиссиясининг йиғилиш баёни билан Қумқўрғон туманидаги бизга бириктирилган ерлар бошқа кластерга ўтказиб берилди. Афсуски, бу амалдаги қонунларга зид», — деди Дилмурод Эшниёзов.
Унинг қўшимча қилишича, кластер томонидан тортиб олинган ерларга 2022 йилнинг ҳосили учун 1 ноябрдан фермер хўжаликлари билан фьючерс шартномаси имзолаб, уни молиялаштириб, агротехника: ер текислаш, шудгорлаш, чигит тайёрлаш каби ишлар олиб борган. Ушбу харажатлар учун кластер ҳисобидан 34 миллиард 500 миллион сўм харажат қилинган бўлса-да, ер ажратилган кластер ёки ҳукумат томонидан қоплаб берилмаган. Бунинг устига ҳосилни йиғиб олишга ҳам рухсат берилмаган.
Вазирлар Маҳкамасининг «Пахта-тўқимачилик кластерлари фаолиятини ташкил этиш тартиби тўғрисида»ги низомга мувофиқ янги пахта-тўқимачилик кластерини ташкил этиш Вазирлар Маҳкамасининг қарори билан амалга оширилиши қайд этилган. Лекин Termiz Jayxun Cluster пахта-тўқимачилик кластерига бириктирилган ерларни олиб қўйиш ҳақида Вазирлар Маҳкамаси қарор қилмаган.Низомга кўра, янги пахта-тўқимачилик кластерлари ташкил этиладиган ҳудудлар ҳар йили 20 августга қадар масъул идораларнинг расмий веб-сайтларида эълон қилиниши ва аризалар 1 октябрга қадар кўриб чиқилиши белгиланган. Аммо Termiz Jayxun Cluster пахта-тўқимачилик кластерига бириктирилган ерлар мавсумнинг ўртасига келиб, март ойида олиб қўйилган.
Тартибга биноан, фаолияти тугатилаётган пахта-тўқимачилик кластерлари тугатилаётган йилдаги мавсум бўйича пахта ҳосилини тўлиқ йиғиб (сотиб) олишга рухсат берилса-да, Termiz Jayxun Cluster пахта-тўқимачилик кластерига ҳосилни олишга рухсат ва сарф этилган 34 миллиард 500 миллион сўм қоплаб берилмаган.
Дилмурод Эшниёзов, Termiz Jayxun Cluster пахта-тўқимачилик кластери раҳбари ўринбосари
Ҳолат юзасидан Адлия вазирлиги хулоса берар экан, Ўзбекистон Республикаси президентининг 2021 йил 16 ноябрдаги «Пахта-тўқимачилик кластерлари фаолиятини тартибга солиш чора-тадбирлари тўғрисида»ги фармонига кўра, пахта-тўқимачилик кластерини ташкил этиш Республика комиссияси хулосасига асосан Вазирлар Маҳкамасининг қарори билан амалга оширилишини алоҳида таъкидлаб ўтган.
Мазкур фармоннинг 3-бандида талабгор ва тегишли идоралар ўртасида тўрт томонлама битим ўттиз йил муддатга тузилиш назарда тутилган бўлиб, тўрт томонлама битимни томонларнинг ҳеч бўлмаганда биттаси қарши бўлган тақдирда бекор қилиш фақатгина суд тартибида амалга оширилиши белгилаб қўйилган.Кластер маъмурияти ерни олиб қўйиш сабабларини билиш ва ўз қонуний манфаатларини ҳимоя қилишни сўраб Савдо-саноат палатасига, пахта-тўқимачилик кластерлари уюшмасига ва ҳуқуқни муҳофаза қилувчи органларга арз қилган, лекин уларнинг бари судга мурожаат қилишни тавсия қилиш билан чекланган. Йилига пахта-тўқимачилик кластерлари уюшмасига аъзолик бадали сифатида 100 миллион сўм тўлаган бўлса-да, уюшма кластерга ҳеч қандай ёрдам бермаган.Шу билан бирга, Вазирлар Маҳкамасининг пахта-тўқимачилик кластерлари фаолиятини ташкил этиш тартиби тўғрисидаги низомнинг 23-бандида битимга ўзгартириш ва қўшимчалар киритиш тарафларнинг келишувига кўра амалга оширилиб, тарафлардан бирининг битимга ўзгартириш ва қўшимчалар киритиш тўғрисидаги таклифи қолган тарафлар томонидан рад этилган тақдирда, ушбу масала юзасидан судга мурожаат қилиниши мумкинлиги назарда тутилган.
Мазкур низомнинг 41-бандида битимни бекор қилишга (тўлиқ ёки муайян ҳудудга нисбатан) асос бўлувчи ҳолатлар келтирилган бўлиб, пахта-тўқимачилик кластерлари томонидан битимда назарда тутилган мажбуриятлар белгиланган муддатда бажарилмаганда ёки пахта хом ашёси етиштирувчиларнинг учдан икки қисми пахта тўқимачилик кластери томонидан шартнома муносабатларини уч йил давомида бажарилмай келганлигини асословчи ёзма мурожаатлар бўлганда суд томонидан амалга оширилиши қайд этилган.
Юқоридагилардан келиб чиқиб, мурожаатингиздан кўтарилган масалалар юзасидан белгиланган тартибда судга мурожаат қилишингиз мақсадга мувофиқлиги маълум қилинади, — дея Ҳуқуқни қўллаш амалиётини ўрганиш бошқармаси ҳуқуқий тушунтириш берган.
«Дарё» воқеалар ривожини кузатиб боради.
Изоҳ (0)