Andijon viloyati Xo‘jaobod tumani va Farg‘ona viloyati Marg‘ilon shahrida kuchli ta’sir qiluvchi dori vositalarini muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Xo‘jaobod tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda J.T. va J.S. ismli shaxslar fuqaro A.ga 994 dona “Lirika” nomli kuchli ta’sir qiluvchi dori vositasini 1 700 dollarga sotgan vaqtida ushlangan. Tadbir yakunida umumiy bahosi 68,7 million so‘mlik 4 ming 4 dona dori vositalari ashyoviy dalil sifatida olingan.
Shuningdek, Marg‘ilon shahar bo‘limi tomonidan DXX xodimlari bilan hamkorlikda tezkor tadbir o‘tkazilgan. Jarayon davomida fuqaro U.I. boshqa bir fuqaro A.ga 240 dona “Tropikamid” nomli kuchli ta’sir qiluvchi dori vositasini 21,6 million so‘mga sotgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)