Farg‘onada 231 mln so‘mlik kuchli ta’sir qiluvchi dori vositalarining noqonuniy olib kirilishiga chek qo‘yildi

Farg‘onada 231 million so‘mlik kuchli ta’sir qiluvchi dori vositalarining noqonuniy olib kirilishiga chek qo‘yildi. Bu haqda “Daryo”ga viloyat bojxona boshqarmasi axborot xizmati ma’lum qildi.

Qayd etilishicha, viloyat bojxona boshqarmasi kontrabandaga qarshi kurashish bo‘limi xodimlari tomonidan DXX bilan hamkorlikda tezkor tadbir o‘tkazilgan.

Tezkor tadbir davomida Farg‘ona—Qo‘qon yo‘nalishida harakatlanayotgan fuqaro N.A. boshqaruvidagi Lacetti avtomashinasi kuzatuvga olinib, Oltiariq tumani hududida to‘xtatilgan va xolislar ishtirokida ko‘zdan kechirilgan. Natijada avtomashina old o‘rindig‘ida xorijda ishlab chiqarilgan, sifati va bojxona rasmiylashtiruvidan o‘tganligini tasdiqlovchi hujjatlari bo‘lmagan, umumiy qiymati 231 million so‘mlik 1 ming 118 dona “Regopen” hamda 398 dona “Tropikomid” nomli kuchli ta’sir qiluvchi dori vositalari borligi aniqlandi.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.