Tojikiston va Qirg‘iziston ishchi guruhlari 18-sentabr kuni “Guliston” chegara punktida uchrashib, davlatlar chegarasidagi yo‘llarni ochish va transport qatnovini ta’minlashga kelishib oldi. Bu haqda Tojikistonning ushbu chegara punkti joylashgan So‘g‘d viloyati raisi matbuot xizmati xabar qildi.
Shu kuni Qirg‘izistonning Botken viloyatidagi Tojikiston eksklavi — Vorux qishlog‘iga yo‘l ochildi. Bu hududda to‘qnashuvlar 14-sentabrda boshlangan edi.
“Uchrashuvda tomonlar mavjud muammolarni muzokaralar yo‘li bilan hal etish zarurligini yana bir bor ta’kidladi. Shu bilan birga, o‘t ochishni to‘xtatish shartlariga rioya qilish va chegaradagi to‘qnashuvlar oqibatlarini imkon qadar tezroq bartaraf etish muhim deb topildi”, — deyiladi xabarda.
Qirg‘iziston va Tojikiston chegarasida 16-sentabrga o‘tar kechasi mojaro avj oldi. Qirg‘izistonda Botken viloyatining Botken va Laylak tumanlari hamda O‘sh viloyatining bir qismi, Tojikistonda So‘g‘d viloyatining Isfara va G‘ofurov tumanlari bir qismi va Laxsh tumani o‘qqa tutildi. Qirg‘izistonning Botken viloyatida favqulodda holat joriy etildi.
O‘sha kuni ikki davlat rahbarlari Sadir Japarov va Emomali Rahmon o‘t ochishni to‘xtatish bo‘yicha kelishib oldi, biroq keyinchalik bu kelishuv buzildi.
Japarov 19-sentabrni Tojikiston bilan bo‘lgan mojaroda halok bo‘lganlar xotirasiga milliy motam kuni deb e’lon qildi. Bishkek 46 kishi halok bo‘lganini, Dushanbe esa qurbonlar soni 38 ga yaqin ekanini, ularning orasida tinch aholi vakillari ham borligini da’vo qildi. Qirg‘iziston rasmiylari shuningdek, to‘rt nafar harbiy xizmatchi bedarak yo‘qolganini ma’lum qildi.
Izoh (0)