Qozog‘iston poytaxtida Nur-Sulton nomi yozilgan yozuvlar demontaj qilinmoqda (video)

Qozog‘iston poytaxtida shaharning eski — Nur-Sulton nomi yozilgan yozuvlar demontaj qilinmoqda, deb xabar beradi Tengrinews.

Hozirgacha poytaxtning eski nomidan iborat yuzga yaqin axborot pannolari olib tashlandi.

Bugun, 19-sentabr kuni Qozog‘iston poytaxti nomini Nur-Sultondan Ostonaga o‘zgartirish haqidagi farmon kuchga kirdi.

Mamlakat prezidenti Qosim-Jo‘mart To‘qayev shahar qayta nomlanishi haqidagi qonunni 17-sentabr kuni, mamlakat Konstitutsiyasiga tuzatishlar kiritilishi to‘g‘risidagi qonun bilan birgalikda, imzolagandi.

Poytaxtga 2019-yilda Qozog‘iston birinchi prezidenti Nursulton Nazarboyev sharafiga nom berilgan edi, o‘shanda shaharning nomini o‘zgartirishni To‘qayevning o‘zi taklif qilgandi. Undan avval poytaxt Ostona deb atalgan va unga yana shu nom qaytib berildi.

1998-yilgacha respublika poytaxti Olmaota shahri bo‘lgan, hozirgi poytaxt esa Akmola deb atalgan.

Tengrinews qayd etishicha, poytaxt maslahati (mahalliy parlament) shaharning qayta nomlanishi bu safar budjetga uch yil avvalgidan ko‘ra arzonroq tushishiga umid bildirgan. O‘shanda, maslahat kotibi Yerlan Kanalimovning so‘zlariga ko‘ra, davlat organlarida tabellar, blankalar va muhrlarni almashtirish 30 million tengedan ziyodga (o‘sha vaqtdagi kurs bo‘yicha 80 ming dollardan ortiq) tushgan. Endi elektron hujjatlar almashinuviga to‘liq o‘tilgani sababli xarajatlar kamayadi. Chiqimlar mahalliy budjet tomonidan qoplanadi.