18-sentabr, yakshanba kuni Yerevan markazidagi Ozodlik maydonida miting bo‘lib o‘tdi, unda ishtirokchilar Armanistonning Kollektiv xavfsizlik shartnomasi tashkilotidan (KXSHT) chiqishini talab qildi. Bu haqda Deutsche Welle xabar bermoqda.
OAV hisob-kitoblariga ko‘ra, mitingga bir necha yuzdan bir necha minggacha odam yig‘ilgan. Miting AQSH Kongressi Vakillar palatasi spikeri Nensi Pelosining Yerevanga tashrifi fonida bo‘lib o‘tdi.
Aksiyalarda, xususan, Armaniston Yevropa partiyasining raisi Tigran Xzmalyan boshchiligidagi vakillari ishtirok etdi. Uning so‘zlariga ko‘ra, Rossiya va Turkiya “armanlarga qarshi shartnoma” imzolagan, oqibatda Tog‘li Qorabog‘ boy berilgan.
“Agar biz KXSHT va Yevrosiyo iqtisodiy ittifoqini tark etsak, NATO va Yevropa Ittifoqiga kirsak, unda yo‘qotilgan yerlarimizni qaytarib beramiz”, — dedi siyosatchi.
Namoyishchilarning aytishicha, Armaniston KXSHTdan chiqsa, G‘arbdan harbiy yordam olishi mumkin.
Nensi Pelosi 17-sentabr kuni Ozarbayjon bilan chegaradagi mojaro avj olgan bir paytda Armanistonga kelgan edi. U AQSHning Armaniston xavfsizligi va demokratiyasini qo‘llab-quvvatlashiga ishontirdi. Bosh vazir Nikol Pashinyan bilan uchrashuvda Pelosi AQSH Tog‘li Qorabog‘ masalasida Armanistonning do‘sti ekanini aytdi.
“Armanistonda demokratiyani targ‘ib qilish, armanlar genotsidini tan olish to‘g‘risidagi rezolyutsiya, Tog‘li Qorabog‘ masalasida Turkiyaga qarshilik ko‘rsatish va barcha masalalarda biz Armaniston bilan do‘stmiz. Hukumatingizni hurmat qilganimiz uchun shu yerdamiz”, — dedi spiker.
19-sentabr kungi brifingda Pelosi “Ozarbayjonning halokatli zarbalari”ni qoraladi va buni Armaniston suverenitetiga hujum deb atadi. Ozarbayjon Tashqi ishlar vazirligi esa ushbu bayonotlarni asossiz va adolatsiz deb atadi.
Izoh (0)