Тожикистон ва Қирғизистон ишчи гуруҳлари 18 сентябрь куни «Гулистон» чегара пунктида учрашиб, давлатлар чегарасидаги йўлларни очиш ва транспорт қатновини таъминлашга келишиб олди. Бу ҳақда Тожикистоннинг ушбу чегара пункти жойлашган Сўғд вилояти раиси матбуот хизмати хабар қилди.
Шу куни Қирғизистоннинг Боткен вилоятидаги Тожикистон эксклави — Ворух қишлоғига йўл очилди. Бу ҳудудда тўқнашувлар 14 сентябрда бошланган эди.
«Учрашувда томонлар мавжуд муаммоларни музокаралар йўли билан ҳал этиш зарурлигини яна бир бор таъкидлади. Шу билан бирга, ўт очишни тўхтатиш шартларига риоя қилиш ва чегарадаги тўқнашувлар оқибатларини имкон қадар тезроқ бартараф этиш муҳим деб топилди», — дейилади хабарда.
Қирғизистон ва Тожикистон чегарасида 16 сентябрга ўтар кечаси можаро авж олди. Қирғизистонда Боткен вилоятининг Боткен ва Лайлак туманлари ҳамда Ўш вилоятининг бир қисми, Тожикистонда Сўғд вилоятининг Исфара ва Ғофуров туманлари бир қисми ва Лахш тумани ўққа тутилди. Қирғизистоннинг Боткен вилоятида фавқулодда ҳолат жорий этилди.
Ўша куни икки давлат раҳбарлари Садир Жапаров ва Эмомали Раҳмон ўт очишни тўхтатиш бўйича келишиб олди, бироқ кейинчалик бу келишув бузилди.
Жапаров 19 сентябрни Тожикистон билан бўлган можарода ҳалок бўлганлар хотирасига миллий мотам куни деб эълон қилди. Бишкек 46 киши ҳалок бўлганини, Душанбе эса қурбонлар сони 38 га яқин эканини, уларнинг орасида тинч аҳоли вакиллари ҳам борлигини даъво қилди. Қирғизистон расмийлари шунингдек, тўрт нафар ҳарбий хизматчи бедарак йўқолганини маълум қилди.
Мавзуга доир:«Толибон» Бишкек ва Душанбени муроса қилишга чақирди
Изоҳ (0)