Фарғонада 231 миллион сўмлик кучли таъсир қилувчи дори воситаларининг ноқонуний олиб кирилишига чек қўйилди. Бу ҳақда «Дарё»га вилоят божхона бошқармаси ахборот хизмати маълум қилди.
Қайд этилишича, вилоят божхона бошқармаси контрабандага қарши курашиш бўлими ходимлари томонидан ДХХ билан ҳамкорликда тезкор тадбир ўтказилган.
Тезкор тадбир давомида Фарғона—Қўқон йўналишида ҳаракатланаётган фуқаро Н.А. бошқарувидаги Lacetti автомашинаси кузатувга олиниб, Олтиариқ тумани ҳудудида тўхтатилган ва холислар иштирокида кўздан кечирилган. Натижада автомашина олд ўриндиғида хорижда ишлаб чиқарилган, сифати ва божхона расмийлаштирувидан ўтганлигини тасдиқловчи ҳужжатлари бўлмаган, умумий қиймати 231 миллион сўмлик 1 минг 118 дона «Регопен» ҳамда 398 дона «Тропикомид» номли кучли таъсир қилувчи дори воситалари борлиги аниқланди.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)