Jahon bankining “Farg‘ona vodiysida suv resurslarini boshqarish. 2-bosqich” loyihasini amalga oshirish doirasida suv xo‘jaligi qonunchiligi, suv resurslarini boshqarish, tashkiliy, institutsional, huquqiy tuzilmalar, suv resurslarini moliyaviy-iqtisodiy qo‘llab-quvvatlash mexanizmini o‘rganish maqsadida O‘zbekiston delegatsiyasi amaliy safar bilan Ispaniyada bo‘ldi, deb xabar bermoqda “Dunyo” axborot agentligi.
Qayd etilishicha, O‘zbekiston diplomatiya vakolatxonasi ko‘magida tashkil etilgan ushbu safar doirasida elchixonada delegatsiya a’zolari Ispaniyaning “Gedepsa S.A.” promouterlik va konsalting kompaniyasi vakillari bilan uchrashgan.
Ushbu kompaniya 1982-yilda Madridda tashkil etilgan bo‘lib, Vengriya, Chexiya, Qozog‘iston, Armaniston, Gruziya va O‘zbekistonda o‘z vakolatxonalariga ega. Kompaniya vakolatxonasi tomonidan O‘zbekistonda Ispaniyaning suv-ekologiya, sanoat, qishloq xo‘jaligi va ta’lim sohalarida faoliyat yurituvchi yirik kompaniyalari ta’lim va ilmiy muassasalarni jalb qilgan holda loyihalarni hayotga tadbiq etadi.
Tadbirda Ispaniya tomoni O‘zbekiston delegatsiyasini o‘z mamlakatida suv resurslarining boshqarilishi bo‘yicha taqdimot o‘tkazgani barobarida mamlakatda Ispaniyaning “Ayeco” va “Inima” kabi yetakchi kompaniyalari bilan hamkorlikda amalga oshiriladigan suv resurslarini boshqarish loyihasi bilan tanishtirgan.
Uchrashuv yakunlari bo‘yicha Suv xo‘jaligida xorijiy investitsiya loyihalarini amalga oshirish markazi direktori Baxtiyor Kamolov va “Gedepsa S.A.” prezidenti Alxandro Pastrana Molero Hamkorlik memorandumini imzolagan.
Hujjatda suv ta’minotining samarali tizimlarini yaratish, suv resurslarini iste’mol qilish va ulardan foydalanish samaradorligini oshirish, suv xo‘jaligi sohasida muqobil energiya resurslaridan foydalanishning innovatsion texnologiyalarini joriy etishga qaratilgan qo‘shma investitsiya loyihalarini ishlab chiqish, shuningdek, ularni amalga oshirish uchun Ispaniyaning davlat va xususiy mablag‘larini jalb etish vazifalari belgilangan.
Izoh (0)