Buxoro shahridagi 2-umumiy o‘rta ta’lim maktabi sinfxonalaridan birining shifti qulab tushdi. Bu haqda voqea joyida bo‘lgan “Daryo” muxbiri xabar berdi.
Ma’lum qilinishicha, 18-sentabr kuni tunda 2-umumiy o‘rta ta’lim maktabining 10-sinf o‘quvchilari tahsil oladigan sinfxona shifti qulab tushgan. Shiftga o‘rnatilgan plastik material tushib, tuproqlarining to‘kilib ketishiga sabab bo‘lgan.
Shu kuni tunda navbatchilikda bo‘lgan maktab qorovuli Dmitriy Starsevning “Daryo”ga ma’lumot berishicha, u taxminan soat 24:00 dan keyin maktabning barcha sinfxonalarini ko‘zdan kechirgan. Bu paytda sinfxonada bu holat ro‘y bermagan.
Tun yarmida maktabning barcha sinfxonalarini har doimgidek birma-bir ko‘zdan kechirdim. Maktab qorovulxonasi talafot yetgan sinfdan 50-70 metrcha uzoq masofada joylashgan. Men nazorat qilib chiqqan paytimda hech qanday ko‘ngilsizlik kuzatilmagan edi”, — deydi Dmitriy Starsev.
Maktab direktori Zamira Ahmedovaning so‘ziga ko‘ra, shu paytgacha shiftining yarmi tushib ketgan sinfxonada yoxud maktabning boshqa sinfxonalarida qurilishdagi kamchilik ko‘zga tashlanmagan.
Maktabimiz ikkita binodan iborat bo‘lib, biri 1937-yili 330 o‘rinli, ikkinchi binosi esa 1980-yilda 600 dan ortiq o‘ringa mo‘ljallab qurilgan. Maktabimizda o‘qish talabi juda yuqori. 2218 nafar o‘quvchi ikki smenada tahsil oladi. 26 yildan buyon direktorlik qilib kelaman, ammo shu yillar davomida yuqori turuvchi tashkilotlarga biror marotaba ta’mirlash yoxud to‘liq rekonstruksiya qilish masalasida murojaat qilmaganmiz. Har doim o‘z kuchimiz, ota-onalarning ixtiyoriy tashabbuslari va homiylar ko‘magida maktabimizni zamonaviy maktablardan qolishmaydigan darajada saqlab, asrab kelganmiz. Birinchi binoning yog‘och taxtadan iborat eskirgan shift qismlarini uch yil ilgari plastik qurilish materiali bilan mustahkam qoplaganmiz. Yog‘ochlarning eskirgani sabab binoning ikkinchi qavatidagi 33-xona, ya’ni 10-“V” sinf o‘quvchilariga mo‘ljallangan sinfxona shiftining yarmi o‘pirilib tushib, qumlari to‘kilishiga sabab bo‘lgan”, — deydi Zamira Ahmedova.
Maktab mas’ullari holatdan 19-sentabr kuni tonggi 08:00 larda xabar topgan. Shifti talafot ko‘rgan sinfxona rahbari xonani ochgan va holatga guvoh bo‘lgan. Zudlik bilan tegishli idora va tashkilotlarga xabar berilgan.
Tun yarmidan og‘ganda, plastik material ostidagi yog‘och taxtalar bir-bir to‘kilgan va shu bois, gumbirlagan yoxud, keskin “taraq-turuq” tovush chiqarmagan, degan xulosaga keldik. Maktab qorovuli ham holatdan xabarsiz qolgan. Hech kim jabrlanmagan va jarohat olmagan. O‘quv jarayonini to‘xtatmaslik hamda sinf o‘quvchilarini xona bilan ta’minlash maqsadida zudlik bilan amaliy choralarni ko‘rdik. Ayni paytda ushbu sinf o‘quvchilari maktab kutubxonasiga joylashtirildi. Dars soatlari bir soat ham qoldirilmadi. Bino foydalanishga topshirilganiga 85 yildan oshgan bo‘lsa-da, saqlanishi va asralgan holati zamonaviy maktablardan qolishmaydi”, — deydi Buxoro shahar XTB boshlig‘i Murod Mattiyev.
Maktab direktoriga ko‘ra, viloyatning qurilish sohasidagi mutaxassislari tomonidan binoda o‘rganish va ekspertiza ishlari olib borilmoqda.
Ekspertlar xulosasiga ko‘ra, maktabimiz to‘liq rekonstruksiya qilinadi yoxud talafot yetgan va talafot yetishi mumkin bo‘lgan qismlari mustahkamlanadi”, — deydi maktab direktori.
Izoh (0)