Бухоро вилоятининг Қорақир чўл ҳудудида жойлашган Йўрға тувалоқларни кўпайтириш марказидан 200 бошдан ортиқ тувалоқлар табиат қўйнига учириб юборилди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси ахборот хизмати раҳбари Маржона Шукурова хабар берди.
Таъкидланишича, бошқарманинг биохилма-хилликни асраш, рақамлаштириш ва кадастрни юритиш бўлими мутахассислари ҳамда «Амирликларнинг Йўрға тувалоқни кўпайтириш маркази» нодавлат-нотижорат ташкилоти билан ҳамкорликда марказда етиштирилган йўрға тувалоқлар табиат қўйнига қўйиб юборилган.
Маълум бўлишича, мазкур марказ туманнинг Қорақир чўли ҳудудида жойлашган бўлиб, ер майдони 400 гектарни ташкил этади.
Марказ Бирлашган Араб Амирликлари вице-президенти, Дубай амирлигининг ҳокими шайх Муҳаммад бин Рошид ал-Мактум ташаббуси билан 2008 йилда фаолият бошлаган. Марказнинг асосий фаолияти Ўзбекистонда Осиё йўрға тувалоғининг барқарор популяциясини қўллаб-қувватлашга қаратилган бўлиб, шу турдаги қушларни кўпайтириш ва асраш ишлари ҳамда ҳар йили ушбу турни ёввойи табиий муҳитга қўйиб юбориш каби тадбирларни ташкил этишдан иборат.
«Қушларни табиатга учириш мавсуми асосан, сентябрь октябрь ойлари ҳисобланади. Куни кеча 200 бошдан ортиқ қуш табиатга қўйиб юборилди. Йўрға тувалоқлар марказда ёввойи табиатда яшаш, озуқаларини топиш, йиртқич ҳайвонларни таниб олиш ва улардан ўзларини яшириш кўникмаларига эга бўлади. Бир неча кундан кейин Ўзбекистондаги Falcon Hunting Solutions ҳамда Пешкудаги Араб амирликларига қарашли нодавлат-нотижорат ташкилоти билан ҳамкорликда яна кўпсонли йўрға тувалоқлар ёввойи табиат қўйнига чиқариб юборилади»,— дейди Маржона Шукурова.
Изоҳ (0)