“Eron SHHTga a’zo bo‘lish orqali G‘arb sanksiyalaridan qutulib qolishi mumkin” — ekspert

Eronning Shanxay Hamkorlik Tashkiloti (SHHT)ga a’zo bo‘lishi mamlakatni G‘arb sanksiyalaridan himoya qilishi mumkin, deydi eronlik siyosiy tahlilchi Nozar Shafiy.

Nozar Shafiyning fikricha, Eronning SHHTga a’zo bo‘lishi amaldagi hukumatning mintaqaviy va xalqaro tashkilotlarga qo‘shilish bo‘yicha faol diplomatiyasidan dalolat beradi va mamlakatga “institutsional kuch” beradi, ya’ni uning uchun yangi imkoniyatlar eshigini ochadi. Mamlakat xalqaro va mintaqaviy tashkilotlarga qo‘shilsa, unga qarshi tahdidlar kamayadi.

Globallashuv xalqaro maydonda keng tarqalgan hodisa bo‘lgani sababli, mintaqaviy va xalqaro tashkilotlarga a’zolik mamlakatlarning globallashuv jarayoniga kirishiga ijobiy ta’sir ko‘rsatadi. Shu nuqta’i nazardan va Eronning jahon iqtisodiyotiga qo‘shilish istagini inobatga olgan holda, uning SHHTga a’zo bo‘lishi jahon iqtisodiyotiga kirishdagi to‘siqlarni bartaraf etishga zamin yaratishi mumkin, — deydi tahlilchi.

Uning aytishicha, bundan ham muhimi Eronning SHHTga a’zoligi Tehron va jahon kuchlari o‘rtasida 2015-yilda imzolangan yadroviy kelishuvni qayta tiklash bo‘yicha muzokaralar barbod bo‘lgan taqdirda, mamlakatga nisbatan kuchayadigan G‘arb bosimidan himoya qilishi mumkin. Yadroviy kelishuv bo‘yicha muzokaralarda muvaffaqiyatga erishilmasa AQSH va uning Yevropadagi ittifoqchilari Islom respublikasiga nisbatan sanksiyalarini o‘z kuchida qoldirishi yoki yangi sanksiyalar joriy etishi mumkin.

Shunday ekan, Eronning SHHTga a’zo bo‘lishi prezident Ibrohim Raisiy hukumati uchun muhim yutuq sifatida qabul qilinadi hamda Eron xalqining turli siyosiy, iqtisodiy va xavfsizlik manfaatlari uchun xizmat qiladi, deb xulosa qildi Nozar Shafiy.

 15—16-sentabr kunlari Samarqand shahrida SHHT sammiti bo‘lib o‘tmoqda. Unda Eronning tashkilotga a’zo bo‘lish tartibini ilgari surish rejalashtirilgan.