Эроннинг Шанхай Ҳамкорлик Ташкилоти (ШҲТ)га аъзо бўлиши мамлакатни Ғарб санкцияларидан ҳимоя қилиши мумкин, дейди эронлик сиёсий таҳлилчи Нозар Шафий.
Нозар Шафийнинг фикрича, Эроннинг ШҲТга аъзо бўлиши амалдаги ҳукуматнинг минтақавий ва халқаро ташкилотларга қўшилиш бўйича фаол дипломатиясидан далолат беради ва мамлакатга «институционал куч» беради, яъни унинг учун янги имкониятлар эшигини очади. Мамлакат халқаро ва минтақавий ташкилотларга қўшилса, унга қарши таҳдидлар камаяди.
Глобаллашув халқаро майдонда кенг тарқалган ҳодиса бўлгани сабабли, минтақавий ва халқаро ташкилотларга аъзолик мамлакатларнинг глобаллашув жараёнига киришига ижобий таъсир кўрсатади. Шу нуқтаъи назардан ва Эроннинг жаҳон иқтисодиётига қўшилиш истагини инобатга олган ҳолда, унинг ШҲТга аъзо бўлиши жаҳон иқтисодиётига киришдаги тўсиқларни бартараф этишга замин яратиши мумкин, — дейди таҳлилчи.
Унинг айтишича, бундан ҳам муҳими Эроннинг ШҲТга аъзолиги Теҳрон ва жаҳон кучлари ўртасида 2015 йилда имзоланган ядровий келишувни қайта тиклаш бўйича музокаралар барбод бўлган тақдирда, мамлакатга нисбатан кучаядиган Ғарб босимидан ҳимоя қилиши мумкин. Ядровий келишув бўйича музокараларда муваффақиятга эришилмаса АҚШ ва унинг Европадаги иттифоқчилари Ислом республикасига нисбатан санкцияларини ўз кучида қолдириши ёки янги санкциялар жорий этиши мумкин.
Шундай экан, Эроннинг ШҲТга аъзо бўлиши президент Иброҳим Раисий ҳукумати учун муҳим ютуқ сифатида қабул қилинади ҳамда Эрон халқининг турли сиёсий, иқтисодий ва хавфсизлик манфаатлари учун хизмат қилади, деб хулоса қилди Нозар Шафий.
15—16 сентябрь кунлари Самарқанд шаҳрида ШҲТ саммити бўлиб ўтмоқда. Унда Эроннинг ташкилотга аъзо бўлиш тартибини илгари суриш режалаштирилган.
Мавзуга доир: Эроннинг ШҲТга аъзо бўлиши нима учун муҳим?
Изоҳ (0)