Checheniston rahbari Ramzan Qodirov Rossiya mintaqalari rahbarlari “mustaqil safarbarlik” e’lon qilishi va Ukrainadagi urushga yuborish uchun ko‘ngillilarni tayyorlashi kerakligini aytdi, deb yozadi Meduza.
“Kreml tomonidan harbiy holat e’lon qilinishini kutish yoki, aksincha, Ukrainada maxsus harbiy operatsiya tugashini kutib bekinib o‘tirish kerak emas. Rossiyaning har bitta subyekti rahbari bugun davlatga yordam berishga shayligini isbotlashi kerak”, — deb yozdi Qodirov Telegram-kanalida.
Checheniston rahbari fikricha, “mintaqalarning har bir rahbari hech bo‘lmaganda bir ming nafar ko‘ngillini tayyorlash, o‘qitish va aslaha bilan ta’minlashga bemalol qurbi yetadi”. “Davlat ko‘lamida bu 85 ming kishilik kattagina harbiy kontingent — deyarli armiya!” — deb yozdi Qodirov va bu eng qisqa muddatda maxsus operatsiya vazifalarini hal qilish imkoniyatini berishini qo‘shib qo‘ydi.
Ramzan Qodirov 14-sentabr kuni Rossiya hududlarini mustaqil ravishda safarbarlik e’lon qilishga chaqirgandi, ammo o‘shanda qancha sonli ko‘ngillilarni jalb qilish zarur deb hisoblashiga aniqlik kiritmagan edi. Checheniston rahbari, shuningdek, Rossiyada harbiy holat e’lon qilinishi zarurligini aytgandi.
Avvalroq KPRF (Rossiya Federatsiyasi Kommunistik partiyasi) yetakchisi Gennadiy Zyuganov Rossiya Davlat dumasi kuzgi sessiyasining birinchi yalpi majlisida nutq so‘zlab, Ukrainadagi “maxsus operatsiya” to‘la-to‘kis urushga aylanib ketganini ma’lum qilgan edi. KPRF yetakchisi qayd etishicha, Duma sessiyasi hali hech “bunday murakkab va keskin vaziyat”da ochilmagan. Uning so‘zlariga ko‘ra, Davlat dumasi ta’tilda o‘tkazgan ikki oy ichida vaziyat, shu jumladan, frontdagi holat ham “tubdan” o‘zgargan. “Lekin har qanday urush javobni talab qiladi. Avvalo, kuchlar va resurslar maksimal darajada safarbar etilishi kerak. Jamiyat jipslashishi va asosiy birlamchi vazifalar aniqlab olinishi kerak”, — deya qo‘shib qo‘ydi siyosatchi.
Rossiya prezidenti matbuot kotibi Dmitriy Peskov va Rossiya hukumatining boshqa vakillari da’vo qilishicha, safarbarlik e’lon qilish rejalashtirilmayapti.
Iyul oyida manbalar Rossiya hukumati umumiy safarbarlik e’lon qilish o‘rniga, hududlar rahbariyatiga kamida bittadan ko‘ngillilar batalyonini yig‘ib berishni topshirganini ma’lum qilgandi. Avgust boshi holatiga, “Kommersant” ma’lumotlariga ko‘ra, 20 dan ortiq mintaqada (shu jumladan, Moskvada) ko‘ngillilar batalyonlari tuzilgan. Rossiya qo‘shinlarida batalyonlar tarkibi 150 dan 500 nafargacha kishini tashkil qiladi.
Izoh (0)