Janubiy Koreya politsiyasi 42 yoshli ayolni qo‘lga oldi, u o‘zining ikki farzandini o‘ldirganlikda gumonlanmoqda. Bolalarning jasadlari avgustda Yangi Zelandiyadagi kimoshdi savdosida sotilgan ikkita chamadon ichidan chiqqan, deb yozadi Meduza.
Kelib chiqishi koreyalik bo‘lgan yangi zelandiyalik ayol Ulsan shahrida 15-sentabrga o‘tar kechasi ushlangan. Politsiya ma’lum qilishicha, 2018-yil iyulida gumonlanuvchi, tergov versiyasiga ko‘ra, Oklendda yetti va to‘qqiz yoshli farzandlarini o‘ldirganidan keyin Yangi Zelandiyadan Janubiy Koreyaga qochgan. U Yangi Zelandiya politsiyasi so‘rovi bilan qo‘lga olingan, endi ayolni rasman ekstraditsiya qilishni talab etish uchun ularda 45 kun vaqt bor.
Politsiyachilar gumonlanuvchini Seulga olib ketish uchun Ulsandagi politsiya uchastkasidan olib chiqayotganida u yuzini kurtkasining kapyushoni bilan yopib oldi va jurnalistlarga qotilliklarga aloqador emasligini ma’lum qilib: “Buni men qilmadim”, — dedi.
Oklend tashqarisidagi Manureva shaharchasida yashovchi oila tashlab ketilgan buyumlardan iborat konteyner savdoga qo‘yilgan onlayn-auksionda chamadonlarni sotib olganidan keyin, Yangi Zelandiya politsiyasi qo‘sh qotillik bo‘yicha surishtiruv boshladi. Chamadonlar boshqa xaridlar bilan birga, oilaning uyiga yetkazib berilgan, shundan keyin 11-avgust kuni ularning ichidan ikki yosh bolaning jasadlari chiqqan. Yangi Zelandiya politsiyasi fikricha, chamadonlar sotuvga qo‘yilishidan avval Papatoetoe Safe Store omborxonasida uch-to‘rt yil mobaynida saqlangan. Jasadlarni topib olgan oila bolalarning o‘limiga aloqador emas, deb hisoblaydi politsiya.
Yangi Zelandiya politsiyasi avvalroq bolalarning qarindoshi 2018-yilda mamlakatni tark etib, boshqa qaytib kelmaganini ma’lum qilgandi. Ayni vaqtda bolalarning Yangi Zelandiyada yashaydigan qarindoshlarini topishga muvaffaq bo‘lishdi (ba’zi ma’lumotlarga ko‘ra, ular bolalarning buvisi va bobosidir).
Avgust oxirida politsiya o‘ldirilgan bolalarning jasadlari shaxsini aniqlagan, biroq ularning ismlarini oshkor qilmagandi. Mahalliy gazetalarga ko‘ra, ular 2009 va 2012-yilda tug‘ilgan qiz va o‘g‘il bola. Ularning jinsi va tug‘ilgan yili rasman ma’lum qilinmagan. OAVlar da’vo qilishicha, bolalarning otasi ularning o‘limidan avval onkologik kasallikdan vafot etgan.
Izoh (0)