AQSH Senatining tashqi ishlar bo‘yicha qo‘mitasi Tayvan bilan diplomatik aloqalarni mustahkamlash hamda Taybeyga 4,5 milliard dollarlik harbiy yordam jo‘natish borasidagi qaror loyihasini tasdiqladi, deb xabar beradi “Interfaks”.
“17 nafar senator qonun loyihasini qo‘llab-quvvatlagan bo‘lsa, qarshi ovozlar soni 5 tani tashkil etdi. Shundan so‘ng qaror Senatning to‘laqonli tarkibi muhokamasiga yuborildi”, — deyiladi xabarda.
Bloomberg ma’lumotlariga ko‘ra, qaror loyihasi to‘rt yil davomida Tayvanni 4,5 milliard dollarlik mudofaa yordami bilan ta’minlash va mazkur orolga qarshi har qanday harakati uchun Xitoy rasmiylari va iqtisodiy institutlarga nisbatan sanksiyalar qo‘llash imkoniyatini o‘z ichiga oladi.
Qo‘mitaga raislik qilayotgan va o‘z navbatida, loyihaning mualliflaridan biri bo‘lgan senator-demokrat Bob Menendes, qarordan ko‘zlangan maqsad Pekin bilan aloqalarni keskinlashtirish emas, balki ehtiyotkorlik ekanini ta’kidladi.
Qaror loyihasi hali to‘laqonli tasdiqlanganicha yo‘q, chunki uning ayrim masalalari Oq uydagilar orasida noroziliklarga sabab bo‘lmoqda, deb yozadi Bloomberg.
Agentlik aniqlik kiritishicha, AQSH ma’muriyati hujjatning aksar bandlarini ma’qullashiga qaramay, “qonun loyihasi AQSHning Pekin bilan 40 yildan ortiq muddat davomidagi aloqalari hamda puxta ishlab chiqilgan ‘yagona Xitoy’ siyosatini buzishi mumkin”.
Izoh (0)