Armaniston va Ozarbayjon chegarasida yuz bergan so‘nggi mojaroda jami 71 nafar ozarbayjonlik harbiy xizmatchi halok bo‘ldi, deya xabar beradi Ozarbayjon Mudofaa vazirligi. 13-sentabrda vazirlik qurbonlar soni 50 nafar ekani haqida ma’lum qilgandi.
13-sentabr kuni e’lon qilingan ro‘yxatga ko‘ra, Armaniston chegarasidagi to‘qnashuvlarda halok bo‘lgan 50 ozarbayjonlikdan 42 nafari armiya askarlari, 8 nafari esa chegarachilar bo‘lgan.
Yerevan va Baku o‘rtasida navbatdagi keskinlik 12-sentabrdan 13-sentabrga o‘tar kechasi boshlandi. Armaniston Ozarbayjonni janubi-sharqiy chegarani o‘qqa tutishda aybladi. O‘z navbatida, Boku ham Armaniston tomondan Ozarbayjon armiyasining ta’minot yo‘llari minalangani, shuningdek, o‘t ochilganini da’vo qildi.
13-sentabr tongida tomonlar Moskva vositachiligida o‘t ochishni to‘xtatishga kelishdi, ammo otishmalar to‘xtamadi va ikki mamlakat ham bunda qarshi tarafni aybladi. 14-sentabr oqshomida tomonlar tinchlik bo‘yicha yana bir bor kelishuvga erishdi. 15-sentabr tongida Yerevan Ozarbayjon bilan chegarada hech qanday to‘qnashuv qayd etilmagani haqida ma’lum qildi.
14-sentabr kuni tushdan keyin Armaniston bosh vaziri Nikol Pashinyan parlamentda mamlakat uchun “mustahkam tinchlik va xavfsizlik”ni kafolatlaydigan hujjatni imzolash rejasi haqida ma’lum qilgandi. Shundan so‘ng Yerevanda norozilik namoyishlari boshlandi. Keyinroq Pashinyan uning so‘zlari noto‘g‘ri talqin qilingani va shu paytgacha Boku bilan hech qanday hujjat imzolanmaganini aytdi.
Yerevan Ozarbayjon bilan ziddiyatni hal qilishda yordam so‘rab Kollektiv Xavfsizlik Shartnomasi Tashkilotiga murojaat qilgan edi. 15-sentabr kuni KXSHT vaziyatni baholash uchun eskalatsiya zonasiga o‘z missiyasini yuboradi.
KXSHT Birlashgan shtabi rahbari Anatoliy Sidorovning aytishicha, tashkilot hozircha jangovar hududga harbiy kontingent yuborish imkoniyatini ko‘rib chiqmayapti. Uning ta’kidlashicha, KXSHTning maxsus missiyasi vaziyatni baholaydi va tashkilotga a’zo mamlakatlar rahbarlariga vaziyatni hal qilishning ehtimoliy variantlarini taqdim etadi.
“Ammo hozircha mintaqaga harbiy xizmatchilar jo‘natish haqida gap yo‘q”, — dedi Sidorov.
Ozarbayjon prezidenti Ilhom Aliyev, o‘z navbatida, Ozarbayjon Qurolli kuchlari rahbariyati bilan tezkor yig‘ilish o‘tkazdi va ziddiyatning kuchayishida Armanistonni aybladi. 15-sentabr kuni Ozarbayjon mudofaa vaziri Zokir Hasanov turkiyalik hamkasbi Hulusi Akar bilan chegaradagi vaziyat haqida gaplashdi. Anqara bu mojaroda Bokuni qo‘llab-quvvatlamoqda va Yerevanni “noto‘g‘ri yo‘ldan qaytishga” chaqirmoqda.
Izoh (0)