Kollektiv xavfsizlik shartnomasi tashkiloti (KXSHT — Armaniston, Belarus, Qozog‘iston, Qirg‘iziston, Rossiya va Tojikiston kiradi) sayti DDoS-hujumga uchradi, deb yozadi Meduza tashkilot Telegram-kanaliga tayanib.
KXSHT bayonotiga ko‘ra, hujum 13-sentabr kuni yarim tunga yaqin boshlangan. Natijada “resurs ish qobiliyati buzilgan, ba’zi axborot xabarlariga o‘zgartirishlar kiritish bo‘yicha noqonuniy urinishlar qayd etilgan”. Tashkilot ta’kidlashicha, 14-sentabr ertalabgacha saytga kirish imkoniyati bo‘lmagan.
“Ayni paytda sayt faoliyati qisman qayta tiklangan, noqonuniy aralashuv kengayishiga yo‘l qo‘ymaslik va zarar yetgan yoki yo‘qotilgan ma’lumotlarni tiklash bo‘yicha chora-tadbirlar olib borilmoqda”, — deyiladi xabarda.
13-sentabrga o‘tar kechasi Armaniston-Ozarbayjon chegarasida jangovar harakatlar qayta boshlandi, shu munosabat bilan Armaniston KXSHTga a’zo mamlakatlarga yordam so‘rab murojaat qildi. Tashkilotdagilar kuch qo‘llashni nomaqbul deb hisoblashini ma’lum qildi va “ziddiyatlarni siyosiy-diplomatik usullar yordamida hal qilishga chaqirdi”. Keyinroq KXSHT “yuzaga kelgan vaziyatga baho berish” uchun Armanistonga o‘z missiyasini yuborishga qaror qildi.
Mavzuga doir:
Izoh (0)