Bugun, 14-sentabrdan Qozog‘iston bug‘doy va un eksportiga qo‘yilgan cheklovlarni bekor qildi. Bu haqda mamlakat Qishloq xo‘jaligi vazirligi xabar berdi.
Avvalroq Qozog‘istonning oziq-ovqat xavfsizligini ta’minlash maqsadida bug‘doy va un eksportiga kvota joriy etishga qaror qilingan edi.
Biroq jahon bozoridagi vaziyat barqarorlashganidan va Qozog‘istonda g‘alla hosildorligi bo‘yicha ijobiy prognozlardan so‘ng kvotani bekor qilishga qaror qilindi.
Bugungi kunga qadar mamlakatning barcha hududlarida o‘rim-yig‘im ishlari davom etmoqda. Hokimliklardan olingan ma’lumotlarga ko‘ra, 11,3 million gektar maydondagi g‘alla o‘rib olinib, rejaning 69,8 foizi bajarilgan.
2022-yilning 7 oyi davomida Yevropaga mamlakat tomonidan 183,3 ming tonna qozoq bug‘doyi jo‘natilgan, bu o‘tgan yilgidan (85,7 ming tonna) 2,1 barobar ko‘pdir.
O‘zbekiston Qozog‘iston bug‘doyining asosiy xaridori hisoblanadi. Joriy yilning birinchi choragidagi ma’lumotlarga ko‘ra, mamlakat Qozog‘istonning qariyb 40 foiz bug‘doyini import qilgan.
Joriy yilning 7 oyi davomida esa O‘zbekiston mamlakatdan 218,3 ming tonna bug‘doy uni sotib olgan.
Izoh (0)