Европанинг энг қашшоқ давлати бўлган Молдова қишга тайёргарлик кўраётгани сабабли оғир аҳволда қолиши кутилмоқда. Бу ҳақда Bloomberg хабар берди.
Молдова иқтисодиёти Россия газининг тўхтатилиши ва энергия нархининг «фавқулодда юқори» эканлиги ҳисобига икки баробар зарбага дуч келиши мумкин.
Мамлакат бош вазири Наталя Гаврилита, Украина ва Руминия ўртасида бўлган 2,6 миллионлик халқ барча сценарийларга тайёрланаётганини, йиллик инфляция 30 фоиздан ошиб кетганини айтди.
Бундан ташқари «Газпром» билан беш йиллик шартномада кўрсатилган қарзларни тўлаш бўйича охирги муддат 1 октябрда тугайди. Музокараларда олдингга силжиш бўлмаса, газ етказиб бериш тўлиқ тўхтатилиши мумкин.
«Газпром» етказиб беришни давом эттирса ҳам, биз истеъмолни камайтиришимиз керак, чунки нархлар ниҳоятда юқори, — деди Бухарестда берган интервьюсида 44 ёшли Гаврилита.
Молдова Европа Иттифоқига қўшилиш амбицияларини илгари сурди. ЕИ етакчилари июнь ойида Украина ва Молдовани аъзоликка номзод сифатида маъқуллаган эди.
Мамлакат ҳукумати вазиятни енгиллаштириш учун ҳаракат қилмоқда. Пойтахт Кишинёвдаги иситиш тизимини газдан иситиш мойига ўтказиш орқали истеъмолни 15 фоизга қисқартириш мақсад қилинган.
Гаврилита ҳукумати Руминия билан потенциал газни арзон нархларда етказиб бериш бўйича музокараларни бошлаган.
Аввалроқ Европада рецессия хавфи охирги 2 йилдаги энг юқори даражага чиққани ҳақида хабар берилган эди
Изоҳ (0)