Avgust oyida Buyuk Britaniyada yillik inflyatsiya iyul oyidagi rekord inflyatsiyadan bir oz pastroq bo‘lgan 9,9 foizni tashkil etdi, ammo bu so‘nggi 40 yildagi eng yuqori ko‘rsatkichlarga juda yaqin. Bu haqda “Kommersant” xabar berdi.
Mamlakat milliy statistika xizmatining qayd etishicha, avgust oyida inflyatsiyaning pasayishiga eng katta hissa avtomobil yoqilg‘isi narxining tushishi bo‘lgan.
Avgust oyida jahon bozorida neft narxining pasayishi fonida benzin narxi litri uchun 0,14 funt sterlingga arzonlashdi.
Natijada iyul oyida 43,7 foizni tashkil etgan motor yoqilg‘isi toifasi bo‘yicha yillik inflyatsiya avgust oyida 32,1 foizga tushdi.
Shu bilan birga, oziq-ovqat narxi bir yildan ko‘proq vaqt davomida o‘sishda davom etmoqda.
Avgust oyida ushbu toifadagi yillik inflyatsiya 13,1 foizni tashkil etib, 14 yil davomidagi eng yuqori darajaga yetdi va shu tariqa bosh inflyatsiyaning yuqori darajasini saqlab qolishga eng katta hissa qo‘shdi.
Avgust oyida iyul oyiga nisbatan oziq-ovqat va alkogolsiz ichimliklar narxlarining 1,5 foizga oshishi ushbu toifadagi 1995-yildan buyon eng katta o‘sish bo‘ldi. Avgust oyida oziq-ovqat toifasida sut, pishloq va tuxum narxi eng ko‘p oshdi.
Mutaxassislarning fikricha, yaqin kelajakda inflyatsiyaning sezilarli darajada pasayishini kutmaslik kerak.
Avvalroq Britaniya tangalari va banknotalari Charlz III portreti tushirilgan yangilariga almashtirilishi haqida xabar berilgandi.
Izoh (0)