Toshkentning Mirzo Ulug‘bek tumanida avtobus yonayotgani aks etgan videolar ijtimoiy tarmoqlarda tarqaldi. FVV holat yuzasidan ma’lumot berdi.
Unda aytlishicha, 14-sentabr kuni soat 09:02 da Milrzo Ulug‘bek va Do‘rmon yo‘li ko‘chalari chorrahasida harakatlanib ketayotgan Mercedes-Benz rusumli avtobusda yong‘in sodir bo‘layotgani to‘g‘risida shahar FVBga xabar kelib tushgan. Shunga ko‘ra 2 ta yong‘in-qutqaruv ekipaji soat 09:05 da hodisa joyiga yetib borgan va yong‘in soat 09:08 da bartaraf etilgan.
Yong‘in natijasida avtobusning motor qismi yonib zararlangan. Hodisa oqibatida tan jarohati olgan va halok bo‘lgan fuqarolar yo‘q. Hozirda yong‘inning kelib chiqish sababi va moddiy zarar miqdori aniqlanmoqda.
“Toshshahartransxizmat” matbuot xizmatining bildirishicha, yong‘in “Yunusobod mebel do’koni — Qorasuv-1” yo’nalishida qatnovchi 63-sonli avtobusda yuz bergan. Mazkur avtobus 2013-yilda ishlab chiqarilgan bo’lib, tasarruf boshidan buyon 889 184 kilometr masofa bosib o‘tgan.
Dastlabki ma’lumotga ko‘ra, mazkur avtobusning tormoz tizimida nosozlik kelib chiqqanligi sababli o‘ng taraf orqa ichki g‘ildirakda yong‘in sodir bo‘lgan. Yong‘in oqibatida avtobus kuzovining orqa g‘ildirak qismiga va salondagi 2 ta o‘rindiqning yon qismiga zarar yetgan.
Hozirda “Toshshahartransxizmat” AJning Ishlab chiqarish texnik bo‘limi xodimlari tomonidan xizmat tekshiruvi olib borilmoqda.
Izoh (0)