Тошкентнинг Мирзо Улуғбек туманида автобус ёнаётгани акс этган видеолар ижтимоий тармоқларда тарқалди. ФВВ ҳолат юзасидан маълумот берди.
Унда айтлишича, 14 сентябрь куни соат 09:02 да Милрзо Улуғбек ва Дўрмон йўли кўчалари чорраҳасида ҳаракатланиб кетаётган Mercedes-Benz русумли автобусда ёнғин содир бўлаётгани тўғрисида шаҳар ФВБга хабар келиб тушган. Шунга кўра 2 та ёнғин-қутқарув экипажи соат 09:05 да ҳодиса жойига етиб борган ва ёнғин соат 09:08 да бартараф этилган.
Ёнғин натижасида автобуснинг мотор қисми ёниб зарарланган. Ҳодиса оқибатида тан жароҳати олган ва ҳалок бўлган фуқаролар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.
«Тошшаҳартрансхизмат» матбуот хизматининг билдиришича, ёнғин «Юнусобод мебель дўкони — Қорасув-1» йўналишида қатновчи 63-сонли автобусда юз берган. Мазкур автобус 2013 йилда ишлаб чиқарилган бўлиб, тасарруф бошидан буён 889 184 километр масофа босиб ўтган.
Дастлабки маълумотга кўра, мазкур автобуснинг тормоз тизимида носозлик келиб чиққанлиги сабабли ўнг тараф орқа ички ғилдиракда ёнғин содир бўлган. Ёнғин оқибатида автобус кузовининг орқа ғилдирак қисмига ва салондаги 2 та ўриндиқнинг ён қисмига зарар етган.
Ҳозирда «Тошшаҳартрансхизмат» АЖнинг Ишлаб чиқариш техник бўлими ходимлари томонидан хизмат текшируви олиб борилмоқда.
Изоҳ (0)