O‘zbekistonda Markaziy Osiyoda yagona bo‘lgan Innovatsion vaksinalar markazi tashkil qilinadi, deb xabar bermoqda Innovatsion rivojlanish vazirligi matbuot xizmati.
Qayd etilishicha, 13-sentabr kuni SHHTga a’zo davlat rahbarlari sammiti doirasida innovatsion rivojlanish vaziri Ibrohim Abdurahmonov hamda Luye Investment Group Co.,Ltd kompaniyasi rahbari o‘rtasida onlayn uchrashuv bo‘lib o‘tdi. Unda Innovatsion rivojlanish vazirligi kompaniya bilan hamkorlikda 2023—2028-yillarda umumiy qiymati 100 million dollarga teng bo‘lgan Innovatsion vaksinalar markazini tashkil etishi bo‘yicha memorandum imzolandi.
Innovatsion vaksinalar markazi — Markaziy Osiyoda yagona to‘liq siklli biotexnologik ishlab chiqish korxonasi bo‘lib, mahalliy va MDH mamlakatlari bozorini yuqori texnologik mahsulotlar bilan ta’minlash imkonini beradi. Loyiha doirasida gepatit A, gepatit B, papilloma, qizamiq, qoqshol va boshqa kasalliklar viruslarini davolashda ishlatiladigan umumiy hajmi 2 milliard dollarga teng bo‘lgan 10 xil vaksinani yiliga 200 million dozada ishlab chiqarish ko‘zda tutilgan.
Ushbu to‘liq siklli biotexnologik ishlab chiqarish korxonasining ilmiy hajmdorligi va kelgusida yuqori malakali ilmiy mutaxassislar jalb qilinishini inobatga olib, Innovatsion vaksinalar markazini Toshkent viloyatida tashkil qilish taklif etilmoqda.
Izoh (0)