Bugun Samarqandga BMT bosh kotibi o‘rinbosari, Eron va Qirg‘iziston prezidentlari hamda Xitoy Xalq Respublikasi raisi tashrif buyuradi

Bugun Samarqandga BMT bosh kotibi o‘rinbosari, Eron va Qirg‘iziston prezidentlari hamda Xitoy Xalq Respublikasi raisi tashrif buyuradi. Bu haqda prezident matbuot kotibi Sherzod Asadov ishtirokida bo‘lib o‘tgan brifingda ma’lum qilindi, deb xabar bermoqda “Daryo” muxbiri.

Sherzod Asadovning aytishicha, bugun ertalabdan Samarqand shahriga xorijiy mehmonlar kelishni boshladi.

“Xususan, hozirgina ilk mehmonimiz – Mo‘g‘uliston Prezidenti Uxnaagiyn Xurelsux Samarqandga yetib keldi. Shuningdek, ayni daqiqalarda Birlashgan Millatlar Tashkiloti bosh kotibi o‘rinbosari Rozmari Di Karloning tashrifi kutilmoqda”, — deydi prezident matbuot kotibi.

Ta’kidlanishicha, bugun Eron Islom Respublikasi Prezidenti Ibrohim Raisiyning rasmiy tashrifi boshlanadi.

“U Samarqandga tushdan so‘ng yetib keladi, oliy darajadagi muzokaralar bugunning o‘zida bo‘lib o‘tadi. Uchrashuv yakunida savdo, kooperatsiya, innovatsiyalar, transport, energetika, turizm va boshqa yo‘nalishlarda hujjatlar imzolanishi rejalashtirilgan”, — deydi Sherzod Asadov.

Shuningdek, bugun kunning ikkinchi yarmida Xitoy Xalq Respublikasi raisi Si Szinpin va Qirg‘iz Respublikasi Prezidenti Sadir Japarovlar ham Samarqandga yetib keladi.

Qolgan barcha mehmonlar tashrifi esa ertaga, 15-sentabr kuni kutilmoqda.

“Bu kuni ko‘plab ikki tomonlama muzokaralar rejalashtirilgan. Kechga yaqin SHHT sammitining norasmiy tadbirlari boshlanadi. Asosiy tadbir esa 16-sentabr kuni O‘zbekiston Respublikasi Prezidenti Shavkat Mirziyoyev raisligida yangi turizm markazidagi Kongress xolda bo‘lib o‘tadi”, — deya qo‘shimcha qiladi prezident matbuot kotibi.

“Samarqand sammiti dozlarb mintaqaviy va global mavzularga boy kun tartibiga ega bo‘lishi, uning yakunlari bo‘yicha SHHT doirasida ko‘p tomonlama hamkorlikni yanada kuchaytirish imkonini beruvchi muhim, qolaversa, tarixiy ahamiyat kasb etuvchi qarorlar va hujjatlar bo‘lishi kutilmokda. Sammit SHHT o‘zaro bog‘liqlikdagi dunyoda ochiq va keng hamkorlikni ilgari suruvchi, davlatlar o‘rtasida do‘stona, o‘zaro teng huquqli va manfaatli serqirra aloqalarni kengaytirishga xizmat qilayotgan nufuzli tashkilot ekanligini tasdiqlab berishi kutilmoqda”, — deya so‘zlarini yakunladi Sherzod Asadov.