Surxondaryo viloyati Boysun tumanidagi “Darband” YPX maskanida iste’molga yaroqsiz go‘sht ortilgan Cobalt to‘xtatib qolindi. Bu haqda viloyat IIB matbuot xizmati xabar berdi.
Ma’lum qilinishicha, viloyat IIB Jamoat xavfsizligi xizmati Jamoat tartibini saqlash boshqarmasi Karantin tadbirlarini ta’minlash bo‘linmasi xodimlari va viloyat Veterinariya va chorvachilikni rivojlantirish boshqarmasi xodimlari bilan hamkorlikda ushbu YPX maskanida reyd tadbirlari o‘tkazilgan.
Reyd davomida Denov—Toshkent yo‘nalishida harakatlanib kelayotgan, Denov tumanida yashovchi fuqaro boshqaruvidagi Cobalt to‘xtatilib, uning yukxonasi tekshirilganida, jami 182 kilogramm yirik shoxli mol go‘shti hech qanday veterinariya hujjatlarisiz Toshkent shahriga sotish uchun olib ketilayotgani aniqlangan.
Ushbu go‘sht mahsulotlari Boysun tuman veterinariya bo‘limi tomonidan laboratoriya tekshiruvidan o‘tkazilganida iste’molga yaroqsizligi aniqlanib, Termiz hayvonot bog‘iga topshirildi.
Haydovchiga nisbatan Ma’muriy javobgarlik to‘g‘risidagi kodeksning 109-moddasi (veterinariya, veterinariya-sanitariya qoidalari va normalarini buzish) bilan ma’muriy bayonnoma rasmiylashtirilgan.
Izoh (0)