Buxoroda o‘tkazilgan “1000 tadbirkor ayol” forumida 100 nafar uy-joyga muhtoj ayolga ijtimoiy yotoqxona topshirildi. Bu haqda “Daryo”ga viloyat Oila va xotin-qizlar boshqarmasi axborot xizmati rahbari Mehriniso Husainova xabar berdi.
Xotin-qizlar tadbirkorligini qo‘llab-quvvatlash va rivojlantirish, “Ayollar daftari”ga kiritilgan xotin-qizlar bandligini ta’minlash, ularni tadbirkorlikka jalb qilish orqali moddiy manfaatdorligini oshirishga qaratilgan forumda “Ayollar daftari”dagi mustaqil ish boshlash arafasida turgan 100 nafar ayolga tadbirkorligini boshlashi uchun subsidiya asosida pechlar va tikuv mashinalari berildi.Bundan tashqari, hayotda turli sabablarga ko‘ra, oilasidan ajrashgan yoki boquvchisini yo‘qotib, norasida farzandlari bilan ko‘chada qolgan, oylab, hatto yillab ijarama-ijara sarson-sargardonlikda yurgan madadga muhtoj oilalar ham e’tibordan chetda qolmadi. “1000 tadbirkor ayol” forumida shunday ayollarga ko‘mak berish maqsadi ham ilgari surildi. Buxoro shahridagi sobiq ‘Buxoroteks’ fabrikasiga qarashli inshootlardan biri zamonaviy qiyofada qayta barpo qilindi va ijtimoiy yotoqxona sifatida foydalanishga topshirildi, — dedi boshqarma boshlig‘i Feruza Ibragimova.
Ta’kidlanishicha, uch qavatdan iborat ushbu inshoot shu kunga qadar abgor ahvolda bo‘lgan. “47-son XKMK” MCHJ bunyodkorlari tomonidan amalga oshirilgan qurilish-ta’mirlash ishlaridan so‘ng bino ko‘rkam qiyofaga kirgan. Loyihaga davlat budjeti hisobidan 6 milliard 320 million so‘m ajratilgan. Yotoqxona mukammal ta’mirdan chiqarilib, 2 milliardga yaqin zarur inventarlar bilan jihozlangan. Ijtimoiy yotoqxona 440 o‘ringa mo‘ljallangan bo‘lib, 100 ta xonadan iborat.
Har bir ayolning farzandi bilan bir shinam xonada risoladagidek, umrguzaronlik qilishi uchun qulay imkoniyat yaratilgan yotoqxona topshirilganida yig‘lab yubordim. 35 yoshga kirdim, ikki nafar farzandim bilan 15 yildan ortiq vaqt ijarama-ijara yurdim. Kimdan dakki eshitdim, kimlar qish-qirovli kunlarda ijara haqini to‘lay olmaganim bois, quvib soldi. Bugun boshimda boshpanam bor. Hukumatga rahmat, — deydi shunday yotoqxonalardan birini olgan fuqaro.
Bulardan tashqari, “Ayollar daftari”ning 3-bosqichiga kiritilgan 15087 nafar ishsiz xotin-qizga amaliy yordam ko‘rsatildi. Tadbirkorlik qilish istagidagi 2390 nafar ehtiyojmand xotin-qizga, 8643 nafar boquvchisini yo‘qotgan, 6229 nafar nogironligi bo‘lgan, 184 nafar uy-joyga muhtoj xotin-qizga 2319 nafar nochor va farzandida nogironlik bo‘lgan xotin-qizlar ham moddiy qo‘llab-quvvatlandi, — dedi boshqarma boshlig‘i.
Shuningdek, 2390 nafar tadbirkorlik qilish istagida bo‘lgan ehtiyojmand xotin-qizlarga, 8643 nafar boquvchisi bo‘lmagan ehtiyojmandga, 6229 nafar ijtimoiy yordamga muhtoj nogironligi bo‘lgan va tibbiy muolajaga muhtojga, 184 nafar uy-joyga muhtoj ehtiyojmand hamda 2319 nafar qaramog‘ida nogiron farzandi bo‘lgan ehtiyojmand xotin-qizlarga amaliy yordam ko‘rsatilgan.
Izoh (0)