Ijtimoiy tarmoqlarda 13-sentabr kuni Poyi kalon majmuasida velosipedlar, odam tashuvchi elektron velosipedlar juda ham ko‘payib, tartibsiz holga kelib qolgani aytilgan murojaat e’lon qilindi. Holat yuzasidan Buxoro viloyati IIB axborot xizmati munosabat bildirdi.
Murojaatda velosipedlar bir necha kishini urib ketgani, turizm politsiyasi nazorat qilmayotgani aytilgan. Shuningdek, namoz vaqtida ham musiqa balandlatib qo‘yilayotgani, velosiped ijaraga oluvchilar umuman e’tiborsiz, odam gavjum joyda ham quvib haydayotgani, fuqaroning bolasini ham urib, boshini yorgani, turizm politsiyasiga aytilganda hokimiyat ruxsat berganini bildirgani, hamma sayyohlar e’tiroz qilayotgani ma’lum qilingan.
Qayd etilishicha, ushbu xabarda ko‘rsatilgan holat bo‘yicha Buxoro viloyati ichki ishlar organlari va boshqa huquqni muhofaza qiluvchi idoralar, viloyat IIB Xavfsiz turizmni ta’minlash boshqarmasiga hech qanday murojaat kelib tushmagan.
Hozirda mazkur holatga aniqlik kiritish maqsadida viloyat IIB Xavfsiz turizmni ta’minlash boshqarmasi tomonidan qo‘shimcha o‘rganishlar olib borilmoqda. O‘rganish davomida biror bir huquqbuzarlik holatlari aniqlansa, aybdor shaxsga nisbatan qonunda belgilangan tartibda chora ko‘riladi.
Yuqorida keltirilgan holat yoki shunga o‘xshash holatlarda Buxoro viloyati Ichki ishlar boshqarmasining 102 qisqa raqamli elektron tizimiga yoki Xavfsiz turizmni ta’minlash boshqarmasining (65) 220-41-80 raqamiga qo‘ng‘iroq qilib xabar berishingizni so‘rab qolamiz, — deyiladi xabarda.
Izoh (0)