Oliy Majlis Qonunchilik palatasidagi “Milliy tiklanish” demokratik partiyasi fraksiyaning yig‘ilishida “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunga o‘zgartish va qo‘shimchalar kiritish haqida”gi qonun loyihasi muhokama qilindi. Bu haqda quyi palata axborot xizmati xabar qildi.
Ta’kidlanishicha, 2030-yilga qadar O‘zbekiston Respublikasida gender tenglikka erishish strategiyasi qabul qilinib, uni 2021—2022-yillarda amalga oshirish bo‘yicha kompleks chora-tadbirlar dasturi tasdiqlangan. Dasturning 1-bandida “gender audit” tushunchasini va uni o‘tkazish tartibini belgilashni nazarda tutuvchi qonun loyihasini ishlab chiqish belgilangan.
Shundan kelib chiqib, yuqoridagi qonun loyihasi ishlab chiqilgan. Ushbu hujjatda “Gender audit vazifalari” va “gender auditni o‘tkazish tartibi” maxsus moddalarda belgilanmoqda. “O‘zbekiston Gender tenglikni ta’minlash masalalari bo‘yicha komissiyasi” nomi “Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasi” nomiga o‘zgartirilyapti.
Muhokamalar davomida deputatlar partiya maqsad va vazifalaridan kelib chiqib qonun loyihasini yanada takomillashtirish bo‘yicha bir qator takliflar bergan. Ularning qonunchilikka kiritilishi xotin-qizlar va erkaklar uchun teng huquq hamda imkoniyatlar kafolatlarini ta’minlash mexanizmlarini kuchaytirishga xizmat qilishi aytilib, qonun loyihasi ma’qullangan.
Yig‘ilishda, shuningdek, kun tartibiga kiritilgan boshqa qonun loyihalari ham muhokama etilib, tegishli qarorlar qabul qilingan.
Izoh (0)