Andijon shahri xalq ta’limi bo‘limi ijtimoiy tarmoqlarda “Andijon shahri xalq ta’limi bo‘limi sertifikatga 150 ming so‘m yig‘moqda” sarlavhasi ostida tarqalgan audioxabarlar yuzasidan munosabat bildirdi.
Qayd etilishicha, prezidentning farmon hamda qarori ijrosini ta’minlash yuzasidan Andijon viloyati xalq ta’limi tizimidagi umumta’lim maktablarining rahbar va xodimlarining axborot kommunikatsiya texnologiyalari sohasidagi bilimlarini rivojlantirish va malakasini oshirish maqsadida qo‘shma qaror imzolangan.
Ushbu qo‘shma qarorning 1-bandida umumta’lim maktablarining direktor va o‘rinbosarlari malakasini oshirish uchun “Andijan Dijital City” texnologik parki va Raqamli texnologiyalar o‘quv markazlarida imtiyozli va shartnoma asosida o‘quv kurslari tashkil etilishi va maktab rahbarlari belgilangan jadval asosida o‘quv kurslarida o‘qishlari belgilangan.
Ijtimoiy tarmoqlarda muhokamalarga sabab bo‘lgan audioyozuv Andijon shahri xalq ta’limi bo‘limi mudiriga tegishli bo‘lib, audioyozuvda u tomonidan o‘quv kurslarida tahsil olayotgan maktab rahbarlariga o‘quv kurslarini yakunlagani to‘g‘risidagi sertifikatlarni olishlari va kurslar uchun belgilangan mablag‘larni to‘lashlari zarur ekani ta’kidlangan.
Mazkur o‘quv kurslari pulli ekani va belgilangan mablag‘ maktab rahbarlari uchun 3 baravar arzonlashtirilgan ekanidan maktab direktorlari xabardor bo‘lgan.
Andijon shahri xalq ta’limi bo‘limi xalq ta’limi tizimini yanada rivojlantirish, maktab direktorlari imiji va salohiyatlarini oshirish maqsadida amalga oshirilayotgan islohotlar asosida bajarilayotgan amaliy ishlarni noto‘g‘ri talqin etmaslikni so‘rab qoladi, — deyiladi xabarda.
Izoh (0)