Андижон шаҳри халқ таълими бўлими ижтимоий тармоқларда «Андижон шаҳри халқ таълими бўлими сертификатга 150 минг сўм йиғмоқда» сарлавҳаси остида тарқалган аудиохабарлар юзасидан муносабат билдирди.
Қайд этилишича, президентнинг фармон ҳамда қарори ижросини таъминлаш юзасидан Андижон вилояти халқ таълими тизимидаги умумтаълим мактабларининг раҳбар ва ходимларининг ахборот коммуникация технологиялари соҳасидаги билимларини ривожлантириш ва малакасини ошириш мақсадида қўшма қарор имзоланган.
Ушбу қўшма қарорнинг 1-бандида умумтаълим мактабларининг директор ва ўринбосарлари малакасини ошириш учун «Andijan Digital City» технологик парки ва Рақамли технологиялар ўқув марказларида имтиёзли ва шартнома асосида ўқув курслари ташкил этилиши ва мактаб раҳбарлари белгиланган жадвал асосида ўқув курсларида ўқишлари белгиланган.
Ижтимоий тармоқларда муҳокамаларга сабаб бўлган аудиоёзув Андижон шаҳри халқ таълими бўлими мудирига тегишли бўлиб, аудиоёзувда у томонидан ўқув курсларида таҳсил олаётган мактаб раҳбарларига ўқув курсларини якунлагани тўғрисидаги сертификатларни олишлари ва курслар учун белгиланган маблағларни тўлашлари зарур экани таъкидланган.
Мазкур ўқув курслари пулли экани ва белгиланган маблағ мактаб раҳбарлари учун 3 баравар арзонлаштирилган эканидан мактаб директорлари хабардор бўлган.
Андижон шаҳри халқ таълими бўлими халқ таълими тизимини янада ривожлантириш, мактаб директорлари имижи ва салоҳиятларини ошириш мақсадида амалга оширилаётган ислоҳотлар асосида бажарилаётган амалий ишларни нотўғри талқин этмасликни сўраб қолади, — дейилади хабарда.
Изоҳ (0)