“Daryo” nashri 14-sentabrda O‘zbekiston va jahonda sodir bo'lgan eng muhim voqealarni e’tiboringizga havola etadi.
Shanxay hamkorlik tashkiloti munosabati bilan Samarqandga davlat rahbarlari tashrifi
Bugun SHHT sammiti munosabati bilan Samarqandga Mo‘g‘uliston prezidenti Uxnaagiyn Xurelsux, Eron Islom Respublikasi prezidenti Ibrohim Raisiy, Qirg‘iziston Respublikasi prezidenti Sadir Japarov hamda Xitoy Xalq Respublikasi raisi Si Szinpin, shuningdek, Birlashgan Millatlar Tashkiloti bosh kotibi o‘rinbosari Rozmari Di Karlo tashrif buyurdi.
Sammitning asosiy tadbirlari ertadan ya’ni 15-sentabrdan boshlanadi.
Farg‘ona viloyati tuman va shaharlarining chegarasi o‘zgartirilishiga senatorlar rozilik bildirdi
Senatning o‘ttiz ikkinchi yalpi majlisida “Farg‘ona viloyatining Uchko‘prik, O‘zbekiston, Dang‘ara, Qo‘shtepa, Toshloq, Farg‘ona tumanlari va Qo‘qon, Marg‘ilon, Farg‘ona shaharlari chegaralarini o‘zgartirish to‘g‘risida”gi qaroriga oid masala ko‘rib chiqildi.
Ta’kidlanishicha, bugungi kunda Farg‘ona viloyati shaharlari va tumanlarining chegaralarida muammoli masalalar mavjud bo‘lib, ushbu hududlarda istiqomat qilayotgan aholining hayotida turli qiyinchiliklarning kelib chiqishiga sabab bo‘lmoqda.
Shu sababli O‘zbekiston Konstitutsiyasi hamda “O‘zbekiston Respublikasining ma’muriy-hududiy tuzilishi to‘g‘risida”gi qonunga asosan Farg‘ona viloyatining yuqorida qayd etilgan tuman va shaharlari chegaralarini o‘zgartirish taklifi ilgari surilmoqda.
Tumanlardan shaharlarga o‘tkazilayotgan aholining uy-joy kadastr hujjatlari va propiskasini qayta rasmiylashtirish talab etiladi. Bunda kadastr hujjatlari va propiskani rasmiylashtirishda fuqarolardan qo‘shimcha mablag‘lar talab etilmaydi. Muhokama etilgan masala bo‘yicha Senatning tegishli qarori qabul qilindi.
“Al-Qoida” 11-sentabr teraktlari haqida kitob chiqardi
“Al-Qoida” tashkiloti 2001-yil 11-sentabrda AQSHda sodir etilgan terrorchilik harakatlariga bag‘ishlangan kitob chop etdi, deb yozadi “Kommersant”.
Kitob teraktlarga 21 yil to‘lishiga atab nashr etilgan. Uning muallifi sifatida “Al-Qoida” yetakchilaridan biri Abu Muhammad al-Masriy ko‘rsatilgan bo‘lib, u 2020-yil Eronda o‘ldirilgan.
Eslatib o‘tamiz, 2001-yil 11-sentabr kuni to‘rtta muvofiqlashtirilgan terrorchilik harakatlari amalga oshirilgan edi. Terrorchilarning to‘rtta guruhi — jami 19 kishi to‘rtta yo‘lovchi samolyotini egallab oldi. Ular ikkita laynerni Nyu-Yorkdagi Jahon savdo markazi minoralariga yo‘naltirdi, uchinchisi Pentagon binosiga borib urildi. To‘rtinchi avialayner yo‘lovchilari va ekipaji terrorchilardan samolyot boshqaruvini olib qo‘yishga urindi va samolyot Pensilvaniya shtatidagi dalaga quladi.
AQSH “Rossiyaning yashirincha ta’siri” haqidagi ma’ruzasini oshkor etdiAQSH o‘z razvedkasining Rossiya tomonidan boshqa mamlakatlarning “yashirincha siyosiy moliyalashtirilishi” haqidagi ma’ruzasini qisman oshkor qildi, deb yozadi “RBK”. Bu haqda brifingda Amerika ma’muriyatining yuqori mansabli vakili ma’lum qildi.
Mansabdorning so‘zlariga ko‘ra, AQSH razvedkasi aniqlashicha, 2014-yildan buyon Rossiya chet eldagi ta’sirini kuchaytirishga 300 million dollardan ortiq mablag‘ sarflagan. Pullar 20 dan ziyod mamlakatdagi xorij partiyalari, siyosatchilari va amaldorlariga yo‘naltirilgan, dedi u. Aynan qaysi mamlakatlar haqida gap borayotganiga AQSH prezidenti ma’muriyati aniqlik kiritmadi.
Izoh (0)