Украина президенти Владимир Зеленскийнинг айтишича, сентябрь ойи бошидан бери украиналик ҳарбийлар мамлакат шарқи ва жанубида Россия ишғоли остидаги олти минг квадрат километрдан ортиқ ҳудудни озод қилган.
«Қўшинларимиз ҳаракати давом этмоқда», — деди Зеленский 12 сентябрь куни кечқурун эълон қилинган видеомурожаатида.
10 сентябрь куни Зеленский ой бошидан бери Украина армияси ўз ҳудудининг қарийб икки минг квадрат километр қисмини озод қилгани ҳақида айтганди, эртаси куни эса Украина Қуролли кучлари жами уч минг квадрат километр ҳудудни назоратига олганини эълон қилди.
Август ойи охирида Украина қуролли кучлари Херсон вилоятига, сентябрь ойи бошида Харьков вилоятига қарши ҳужум бошлади. Харьков йўналишидаги ҳужум уруш бошидан бери энг муваффақиятли бўлди. Харьков вилояти раҳбари Олег Синегубов 11 сентябрь куни Украина ҳарбийлари сентябрь бошидан буён минтақадаги 40 дан ортиқ шаҳар ва қишлоқларни озод қилганини айтди.
Изоҳ (0)