Qozog‘istonda tez yordam xodimlari norozilik harakatlari bilan ish tashlamoqda (video)

Qozog‘istonning Mang‘istov viloyatida tez yordam brigadalarining keskin tanqisligi kuzatilmoqda. Oqtau, Janao‘zen shaharlari va Munayli tumanidan kelgan o‘nlab tibbiyot xodimlari va haydovchilar o‘z faoliyatini to‘xtatib, rahbariyatga qator talablar qo‘ygan. Bu haqda Tengrinews xabar bermoqda.

Qozog‘istonning Mang‘istov shahrida tibbiyot xodimlari bir necha kundan beri ishlashdan bosh tortmoqda. Bunga asosiy sabab esa — mamlakatdagi ushbu soha vakillariga to‘lanadigan maoshlar miqdori kam ekani aytilmoqda.

Avvaliga xodimlar uchun 40 ming tenge qo‘shimcha to‘lov bekor qilindi va bu ko‘plab noroziliklarga sabab bo‘ldi.

Ish tashlovchilar 250-300 ming tenge maosh so‘ramoqda, hozirgi vaqtda ularning maoshi 150-190 ming tengeni tashkil qiladi.

Ish tashlagan jamoalar tufayli Mang‘istov shahrida bor- yo‘g‘i 2 ta tez tibbiy yordam mashinasi xizmat ko‘rsatmoqda.

9-sentyabr kuni 40 ming tenge maosh jo‘natdik. 50 ming tenge haydovchilarga o‘z vaqtida yuborildi. Qolganini ham to‘lashda davom etyapmiz. Ularning maoshi ish vaqtiga bog‘liq. Haydovchilar o‘rtacha 150-160 ming oladi. Feldsherlar esa 190-230 mingdan ortiq.

Amanbek Do‘sjonov, Viloyat tez tibbiy yordam stansiyasi direktori

Shuningdek, viloyat Sog‘liqni saqlash vazirligi rahbariyati shifokorlarni odamlar hayotini saqlab qolishda davom etish uchun ishga qaytishga chaqirgan.

Gap faqat pulda emas. Mamlakatda eng kam maoshni aynan Tez tibbiy yordam xodimlari oladi. Bu qayta ko‘rib chiqilishi kerak. Bizning barcha talablarimiz bir necha bor shahar va viloyat darajasida muhokama qilingan, xatlar yozilgan. Bizga va’dalar berilmoqda lekin hamma qarorlar qog‘ozdagina qolib ketmoqda. Smenada 25 ta tez tibbiy yordam mashinasi bo‘lishi kerak, hozir esa 12 tadan ko‘p emas. Qoidaga ko‘ra ikkita feldsher, bitta shifokor va haydovchi ishlashi kerak. Aslida esa brigadada ahvol boshqacha. Har bir feldsherga smenada 24-30 chaqiruv to‘g‘ri kelyapti. Ikki karra bosimda ishlashga esa hech kim ortiqcha pul to‘lamaydi. Bu biz uchun juda og‘ir ish.

Turar Satqanboyev, feldsher

Ish tashlovchilarning so‘zlariga ko‘ra, 200 mingdan ortiq aholi istiqomat qiluvchi Oqtau shahrida bor-yo‘g‘i beshtagina tez yordam mashinasi mavjud. Ularning ta’kidlashicha, hozirda stansiya mumkin bo‘lgan barcha imkoniyatlarni ishga solgan holda ekstremal vaziyatdan chiqib ketmoqda.

Ayni paytda viloyat sog‘liqni saqlash idoralarida xodimlarning barcha talablarini bajarish imkoniyati yo‘q. Xodimlar bilan muzokaralar davom etmoqda. Odamlardan insonparvarlik va sabr-toqat ko‘rsatish so‘raladi.

Umid qilamanki, namoyishchilar tushunadi, butun umrini o‘z ishiga bag‘ishlagan, shu lavozimda o‘qigan feldsherlar bunchalik g‘ayriinsoniy bo‘lib, aholiga yordam ko‘rsatishni to‘xtatgan bo‘lishi mumkin emas.

Amanbek Do‘sjanov, Mang‘istov viloyati tez tibbiy yordam stansiyasi direktori

Eslatib o‘tamiz, viloyat tez tibbiy yordam va tez tibbiy yordam stansiyasi haydovchilari va feldsherlari 11-sentabrdan beri ishga kelmagan.