Oliy Majlis Senatining 13-sentabr kuni bo‘lib o‘tgan yalpi majlisida Navoiy va Samarqand viloyatlarida yangi ish o‘rinlarini yaratish va aholi bandligini ta’minlash bo‘yicha amalga oshirilgan ishlarni o‘rganish natijalari muhokama etildi. Bu haqda yuqori palata axborot xizmati xabar qildi.
Qayd etilishicha, mazkur viloyatlarda ishsizlikni kamaytirish borasida muayyan natijalarga erishilgan. Xususan, qariyb 120 ming ishsiz fuqaroga mehnat organlari tomonidan bandlik xizmatlari ko‘rsatilgan. 31 ming nafar fuqaro bo‘sh ish o‘rinlariga joylashtirilgan.
Shunga qaramay, yangi ish o‘rinlarini yaratishda bir qator kamchiliklarga yo‘l qo‘yilgan. Xususan, ish o‘rinlari to‘g‘risidagi umumiy hisobotni shakllantirishda takrorlanuvchi raqamlarni chegirib tashlash, soliq organi va Yagona milliy mehnat tizimi elektron ma’lumotlari bazasiga muvofiqligini ta’minlash ishlari oxiriga yetkazilmagan.
Jumladan, Samarqand viloyatida turizm yo‘nalishida yakka tartibda tadbirkorlik subyektlarini tashkil etish hisobiga yaratilgan 5,2 ming ish o‘rni bir vaqtning o‘zida tadbirkorlikni rivojlantirish yo‘nalishida yaratilgan ish o‘rinlarida ham takror qayd etilgan.
Senat raisi Tanzila Norboyeva ushbu masala yuzasidan fikr bildirib, yangi ish o‘rni yaratish hisobotbozlik uchun bo‘lmasligi kerakligiga e’tibor qaratgan.
“Ba’zan bir millionlab ish o‘rni yaratildi, degan hisobotlar beriladi, lekin bu yoqda odamlar xorijga ish izlab ketayotgan bo‘ladi. Bunday holatlarga chek qo‘yish, yangi ish o‘rinlari real yaratilishi, qolaversa, bu ish o‘rni ishga kiruvchining manfaatdorligini ham ta’minlashi kerak.
Albatta, hisobotlar ham kerak. Lekin turli idoralar hisobot yig‘adi, ammo ular ba’zan bir xil raqamlarni qamrab oladi va yakunda raqamlar amaldagidan ko‘payib ketadi. Mana shunday tafovutlarni yo‘q qilish kerak. Elektron tizimlarni mukammal ishlab chiqish orqali bunga erishish zarur”, — deydi Senat raisi.
Shuningdek, yangi ish o‘rinlari yaratgan ayrim tadbirkorlik subyektlari ro‘yxatdan o‘tganiga bir-ikki oy bo‘lishiga qaramay, faoliyatini to‘xtatib qo‘ygani qayd etilgan.
Hududlarda yangi ish o‘rinlarini yaratish va aholi bandligini ta’minlash borasida belgilangan vazifalar, xususan, ish o‘rinlarini soha, tarmoq va hududlar kesimida inventarizatsiyadan o‘tkazish, asossiz ravishda oshirib ko‘rsatilgan ish o‘rinlarini aniqlab, hisobotlarni qayta shakllantirish, “Shaffof qurilish” platformasida g‘olib bo‘lgan pudrat korxonalari tomonidan o‘z loyihasida ko‘rsatilgan ish o‘rinlarida bandlikni ta’minlash ustidan monitoring modulini yaratish yuzasidan tegishli topshiriq va tavsiyalar berilgan.
Izoh (0)