Олий Мажлис Сенатининг 13 сентябрь куни бўлиб ўтган ялпи мажлисида Навоий ва Самарқанд вилоятларида янги иш ўринларини яратиш ва аҳоли бандлигини таъминлаш бўйича амалга оширилган ишларни ўрганиш натижалари муҳокама этилди. Бу ҳақда юқори палата ахборот хизмати хабар қилди.
Қайд этилишича, мазкур вилоятларда ишсизликни камайтириш борасида муайян натижаларга эришилган. Хусусан, қарийб 120 минг ишсиз фуқарога меҳнат органлари томонидан бандлик хизматлари кўрсатилган. 31 минг нафар фуқаро бўш иш ўринларига жойлаштирилган.
Шунга қарамай, янги иш ўринларини яратишда бир қатор камчиликларга йўл қўйилган. Хусусан, иш ўринлари тўғрисидаги умумий ҳисоботни шакллантиришда такрорланувчи рақамларни чегириб ташлаш, солиқ органи ва Ягона миллий меҳнат тизими электрон маълумотлари базасига мувофиқлигини таъминлаш ишлари охирига етказилмаган.
Жумладан, Самарқанд вилоятида туризм йўналишида якка тартибда тадбиркорлик субъектларини ташкил этиш ҳисобига яратилган 5,2 минг иш ўрни бир вақтнинг ўзида тадбиркорликни ривожлантириш йўналишида яратилган иш ўринларида ҳам такрор қайд этилган.
Сенат раиси Танзила Норбоева ушбу масала юзасидан фикр билдириб, янги иш ўрни яратиш ҳисоботбозлик учун бўлмаслиги кераклигига эътибор қаратган.
«Баъзан бир миллионлаб иш ўрни яратилди, деган ҳисоботлар берилади, лекин бу ёқда одамлар хорижга иш излаб кетаётган бўлади. Бундай ҳолатларга чек қўйиш, янги иш ўринлари реал яратилиши, қолаверса, бу иш ўрни ишга кирувчининг манфаатдорлигини ҳам таъминлаши керак.
Албатта, ҳисоботлар ҳам керак. Лекин турли идоралар ҳисобот йиғади, аммо улар баъзан бир хил рақамларни қамраб олади ва якунда рақамлар амалдагидан кўпайиб кетади. Мана шундай тафовутларни йўқ қилиш керак. Электрон тизимларни мукаммал ишлаб чиқиш орқали бунга эришиш зарур», — дейди Сенат раиси.
Шунингдек, янги иш ўринлари яратган айрим тадбиркорлик субъектлари рўйхатдан ўтганига бир-икки ой бўлишига қарамай, фаолиятини тўхтатиб қўйгани қайд этилган.
Ҳудудларда янги иш ўринларини яратиш ва аҳоли бандлигини таъминлаш борасида белгиланган вазифалар, хусусан, иш ўринларини соҳа, тармоқ ва ҳудудлар кесимида инвентаризациядан ўтказиш, асоссиз равишда ошириб кўрсатилган иш ўринларини аниқлаб, ҳисоботларни қайта шакллантириш, «Шаффоф қурилиш» платформасида ғолиб бўлган пудрат корхоналари томонидан ўз лойиҳасида кўрсатилган иш ўринларида бандликни таъминлаш устидан мониторинг модулини яратиш юзасидан тегишли топшириқ ва тавсиялар берилган.
Изоҳ (0)