AQSH prezidenti Jo Bayden ma’muriyati oktabr oyida Xitoyga chiplar va sun’iy intellekt vositalari ishlab chiqarish uchun zarur yarimo‘tkazgichlarni eksport qilish bo‘yicha cheklovlarni kengaytirishni rejalashtirmoqda. Bu haqda Reuters masaladan xabardor manbalarga tayanib, yozmoqda.
Agentlik ma’lumotlariga ko‘ra, AQSH Savdo vazirligi yarimo‘tkazgichlarni eksport qilish bo‘yicha yangi qoidalarni e’lon qilmoqchi, bu haqda Amerikaning uchta kompaniyasiga — KLA Corp., Lam Research Corp. va Applied Materials Inc.ga yo‘llangan maktublarda allaqachon aytib o‘tilgan. Vazirlik ularga 14 nanometrdan kam texprotssesli ilg‘or yarimo‘tkazgichlar ishlab chiqaradigan Xitoy zavodlariga chip ishlab chiqarish uskunalarini ruxsatsiz jo‘natishni taqiqladi.
Yangi qoidalar Nvidia Corp. va Advanced Micro Devices Inc.ga ilgari qo‘yilgan cheklovlarni kengaytirishi mumkin, deyiladi xabarda. Ushbu kompaniyalarga maxsus litsenziyasiz sun’iy intellekt tizimlari uchun bir necha turdagi chiplar yetkazib berish taqiqlangan edi.
AQSH 2020-yilda Xitoy kompaniyalariga Amerika texnologiyasini sotishni cheklay boshladi. Ular orasida Semiconductor Manufacturing International Corp. va Hangzhou Hikvision Digital Technology Co. kabi firmalar bor. Bu chora firmalarning o‘sish sur’atlarini cheklab qo‘ydi, biroq ishlab chiqarishni rag‘batlantirdi, jumladan yirik G‘arb kompaniyalari xitoylik ishlab chiqaruvchilarga qiziqish bildira boshladi, deb yozadi Bloomberg.
Izoh (0)