Checheniston rahbari Ramzan Qodirov Rossiya Mudofaa vazirligiga qo‘shinlarning Balakleya, Kupyansk va Izyumdagi pozitsiyalardan olib chiqib ketilgani bo‘yicha tushuntirishlari uchun minnatdorlik bildirdi, biroq u rossiyalik harbiylar tez orada yo‘qotilgan pozitsiyalar ustidan nazoratni tiklashini va’da qildi. Bu haqda siyosatchi o‘zining Telegram-kanalida gapirgan.
Qodirovning ta’kidlashicha, Xarkov viloyatidagi pozitsiyalardan voz kechish harbiylarning hayotini saqlab qolish uchun zaruriy chora edi, ammo “bu mutlaqo hech narsani anglatmaydi”.
Men, Ramzan Qodirov sizga rasman aytamanki, bu shaharlarning barchasi qaytariladi. U yerda odamlarimiz bor, yigitlar bu ish uchun maxsus qurollangan, yana 10 ming jangchi u yerga ketishga tayyor. Yaqin orada Odessaga ham yetib boramiz, — dedi Qodirov.Uning so‘zlariga ko‘ra, bu yo‘nalishda xatolarga yo‘l qo‘yilgan, ammo qo‘mondonlik tegishli xulosalar chiqarmoqda.
“Agar bugun yoki erta maxsus harbiy operatsiya o‘tkazish strategiyasiga o‘zgartirish kiritilmasa, men Mudofaa vazirligi rahbariyati, mamlakat rahbariyati bilan bog‘lanib, ularga haqiqatan u yerda sodir bo‘layotgan vaziyatni tushuntirishga majbur bo‘laman”, — dedi u.
Shu haftada Ukraina Qurolli kuchlari Xarkov viloyatining bosib olingan hududlarida qarshi hujumga o‘tdi. 8-sentabrda rus qo‘shinlari qamal xavfi ostida Balakleya shahrini, 10-sentabrda esa Kupyansk shahrining g‘arbiy qismi va Izyum shahrini tark etdi.
10-sentabr kuni Rossiya Mudofaa vazirligi birinchi marta Xarkov viloyatidagi chekinishni tasdiqladi. Vazirlik buni “Donetsk yo‘nalishidagi sa’y-harakatlarni kuchaytirish” uchun “qo‘shinlarni qayta yig‘ish bo‘yicha operatsiya” deb atadi.
Izoh (0)