Fransiya prezidenti Emmanuel Makron Rossiya yetakchisi Vladimir Putin bilan telefon orqali suhbatda Rossiyaning Ukrainadagi amaliyotlarini to‘xtatish va muzokaralarni boshlash tarafdori ekanini ma’lum qildi. Bu haqda Yelisey saroyi bayonotiga tayanib, “Interfaks” xabar berdi.
“U Rossiyaning Ukrainadagi harbiy amaliyoti davom etishini qoraladi va uni tezroq tugatish, muzokaralarni boshlash hamda Ukraina suvereniteti va hududiy yaxlitligini tiklash bo‘yicha o‘z talabini eslatdi”, — deyiladi bayonotda.
Ikki davlat rahbarlarining 11-sentabr kuni bo‘lib o‘tgan suhbati yakunlari bo‘yicha prezident kanselyariyasi bayonotiga ko‘ra, Makron Rossiya prezidentiga Zaporojye atom elektr stansiyasi xavfsizligidan xavotirda ekanini bildirgan. Ma’lum qilinishicha, Fransiya prezidenti yaqin kunlarda prezident Putin bilan bu mavzuda yana gaplashadi.
“Prezident Makron prezident Zelenskiy va MAGATE bosh direktori bilan aloqalarni davom ettiradi. Shuningdek, u yaqin kunlarda prezident Putin bilan Zaporojye AES xavfsizligini kafolatlovchi kelishuvga erishish uchun yangi suhbat o‘tkazadi”, — deyiladi xabarda.
Yelisey saroyi ma’lumotlariga ko‘ra, suhbat chog‘ida Makron Istanbul don kelishuvi mavzusini ham ko‘targan va “kelishuv bo‘yicha eksport qilinadigan don haqiqatan ham unga eng muhtoj bo‘lganlarga yetib borishini” ta’minlashga chaqirgan.
Makron Yevropa Ittifoqining sanksiyalari Rossiya qishloq xo‘jaligi mahsulotlarini eksport qilishga to‘sqinlik qilmasligiga ishontirgan.
Avvalroq Kreml matbuot xizmati ham Putin va Makron o‘rtasidagi telefon suhbati haqida xabar bergan edi. Unda “Ukrainadagi vaziyat bo‘yicha batafsil va ochiq fikr almashilgani, bunda asosiy e’tibor Zaporojye AES xavfsizligini ta’minlashga qaratilgani” haqida aytilgan.
Izoh (0)